Qazaqstannan Ózbekstanǵa et ónimderiniń eksporty ulǵaımaq

NUR-SULTAN. QazAqparat – Qazaqstannyń 19 mal sharýashylyǵy ónimin óndirýshisi óz taýaryn Ózbekstanǵa eksporttaý quqyǵyna ıe boldy. Tıisti kelisimge Aýyl sharýashylyǵy mınıstri Erbol Qarashókeevtiń Tashkentke sapary barysynda qol jetkizildi, dep habarlaıdy QazAqparat vedomstvo saıtyna silteme jasap.

«Buǵan deıin tizilimge 37 qazaqstandyq kásiporyn engizilgen bolatyn. Ózbek tarapyna Qazaqstannyń veterınarııa júıesine tolyq sholý jasaý qorytyndysy boıynsha veterınarlyq qyzmettiń kepildigimen taǵy 19 mal sharýashylyǵy ónimin óndirýshi eksporttaý quqyqyǵyna ıe boldy. Nátıjesinde, qazirgi Ózbekstannyń tiziliminde 56 qazaqstandyq kásiporyn bar», - delingen mınıstrlik málimetinde.

Aıta ketsek, 4-6 shilde aralyǵynda Ózbekstan astanasynda Túrki agro-forýmy, Túrki memleketteri uıymy men Ekonomıkalyq yntymaqtastyq uıymyna múshe memleketterdiń Aýyl sharýashylyǵy mınıstrleriniń keńesi ótip jatyr.

QR Aýyl sharýashylyǵy mınıstri Erbol Qarashókeev Ózbekstannyń Aýyl sharýashylyǵy mınıstrliginiń ókilderimen kezdesti. Taraptar halyqaralyq kún tártibiniń mańyzdy aspektileri, onyń ishinde azyq-túlik qaýipsizdigi jáne gýmanıtarlyq daǵdarys máseleleri boıynsha pikir almasty. Condaı-aq, ózara tıimdi yntymaqtastyqty odan ári nyǵaıtý nıetterin pysyqtady.

Mınıstr málim etkendeı, Qazaqstan Túrki memleketteri uıymdary (TMU) elderine otandyq ónimniń eksportyn ulǵaıtýǵa múddeli.

«Búgingi tańda Qazaqstanda TMU elderine aýyl sharýashylyǵy ónimderiniń eksporttyq jetkizilimin aıtarlyqtaı arttyrýǵa múmkindik bar. Sondaı-aq, biz tereń qaıta óńdeý taýarlaryn jetkizýdi ulǵaıtýǵa qyzyǵýshylyq tanytyp otyrmyz», - dedi Erbol Qarashókeev.

Foto: gov.kz