Qazaqstannan Ózbekstanǵa benzın eksporttalmaıdy — Energetıka mınıstrligi

ASTANA. KAZINFORM — BAQ-ta Qazaqstan benzınin Ózbekstannyń satyp alyp jatqany jóninde jalǵan aqparattyń taralýyna baılanysty QR Energetıka mınıstrligi bul málimettiń shyndyqqa sáıkes kelmeıtinin málimdedi.

Búgingi kúni Qazaqstannan Ózbekstanǵa nemese ózge elderge benzın eksporty júzege asyrylmaıdy. Elde munaı ónimderin áketýge tyıym salý engizilgen, al Úkimet zańsyz áketýdiń jáne kontrabandanyń aldyn alý boıynsha Jospardy iske asyryp otyr. 

— Jekelegen BAQ silteme jasaǵan aqparat bıylǵy jyldyń kókteminde qabyldanǵan bir jolǵy jáne ýaqytsha sharaǵa qatysty. Sáýir–mamyr aılarynda el ishindegi janarmaı qory jaǵdaıynda AI-92 markaly benzınniń artyǵyn eksporttaý týraly núktelik sheshim qabyldandy. Mundaı shara halyqaralyq tájirıbede standartty bolyp tabylady jáne ol qoımalardy ońtaılandyrýǵa ári bıýdjetke qosymsha salyq túsimderin ákelýge múmkindik beredi, — dep jazdy vedomstvodan.

Maýsym aıynan bastap, MÓZ-derdegi josparly jóndeý jumystaryna daıyndyq sheńberinde strategııalyq qor jınaqtaý maqsatynda eksport tolyq toqtatyldy.

Mınıstrlik memlekettik retteýdi alyp tastaý jáne eksportqa tyıym salý ishki naryqty turaqtandyrýǵa ári janarmaı qorlaryn aıtarlyqtaı ulǵaıtýǵa múmkindik bergenin atap ótedi. Jazdyń basyna qaraı AI-92 benzıni qory shamamen 70%-ǵa, dızel otyny qory 78%-ǵa artty.

Qazirgi tańda munaı ónimderi naryǵyndaǵy jaǵdaı turaqty. Іshki naryq tolyq kólemde qamtamasyz etilip otyr.

Aıta keteıik, buǵan deıin Ózbekstanda janarmaı men gaz óndirisi tómendegenin jazǵan edik.