Qazaqstannan ótetin tranzıttik júktiń 50%-dan astamy Reseıden keledi - mınıstr
Qazaqstanda jyl sońyna deıin temir jolmen júk tasymaldaý kólemi 300 mln tonnaǵa jetedi. Bul týraly QR Kólik mınıstri Marat Qarabaev aıtyp berdi, dep habarlaıdy Kazinform tilshisi.
Mınıstrdiń aıtýynsha, elimizdiń geografııalyq ornalasýy tranzıttik áleýetti damytýǵa úlken múmkindik berip otyr.
«Bıylǵy 10 aıda temir jol kóligimen júk tasymaldaý kólemi 200 mln 46 myń tonnany qurap, 3%-ǵa ósti. Jyl sońyna deıin shamamen 300 mln tonna júk tasymaldanady. Qazirgi ýaqytta temirjol kóligi ekonomıkanyń eksporttyq baǵyttaǵy qajettilikterin tolyq kólemde qamtamasyz etedi», - dedi M. Qarabaev búgingi Úkimet otyrysynda.
Jyl basynan beri eksporttyq tasymaldaý 70 mln 700 myń tonnany qurap 8, 5%-ǵa ósken.
«Tranzıttik tasymaldar da belsendi qarqynmen damýda. 10 aıdyń qorytyndysy boıynsha tranzıttik júk tasymaldaý kólemi 19%-ǵa ósip, 22 mln 500 myń tonna bolǵan. Bul rette konteınerlik tasymaldar 15%-ǵa ulǵaıdy. Jolaýshylardy tasymaldaý kólemi 2,5%-ǵa artyp, 16 mln 600 myń jolaýshyny qurady. Prezıdenttiń eldiń kóliktik-logıstıkalyq áleýetin damytý tapsyrmasy sheńberinde tranzıttik tasymaldarǵa erekshe nazar aýdarylýda», - dedi Kólik mınıstri.
Konteınerlik tasymaldardyń 2022 jylǵy kórsetkishi 2020 jylmen salystyrǵanda 29%-ǵa artty. Al bıylǵy ósý qarqyny 15% deńgeıinde saqtalyp otyr. Tranzıttik júkterdiń negizgi baǵyttary – Qytaı men Reseı. Reseıden keletin júkter dástúrli tranzıttiń 50%-dan astam kólemin alady.
«Degenmen, sońǵy jyldary Qytaıdan Eýropa jáne kórshiles elderge Qazaqstan arqyly jóneltiletin tranzıttik júk kólemi edáýir artyp, Qytaı Halyq Respýblıkasynyń qazaqstandyq tranzıttik tasymaldaýdaǵy úlesi 27%-ǵa deıin ulǵaıdy. Ol tıisinshe, 6 mln 200 myń tonnaǵa teń. Bul rette bizdiń negizgi mindetimiz – transqazaqstandyq baǵyttardyń tartymdylyǵyn arttyryp, ekonomıka men halyqaralyq tranzıt qajettiligin tıisti ınfraqurylymmen qamtamasyz etý», - dedi M. Qarabaev.
