Qazaqstannan munaıdyń úzdiksiz jetkizilgeni mańyzdy – Aýstrııa mınıstri
ASTANA. KAZINFORM – Qazaqstan – Aýstrııanyń Ortalyq Azııadaǵy eń mańyzdy ekonomıkalyq seriktesi. Ásirese energetıka jáne jetkizilimderdiń senimdiligi mańyzdy baǵyt bolyp qala beredi. Bul týraly Aýstrııa Respýblıkasynyń Eýropa jáne halyqaralyq ister jónindegi federaldyq mınıstri Beate Maınl-Raızınger BAQ-qa málimdemesinde aıtty.
Onyń aıtýynsha, elde kóptegen aýstrııalyq kompanııalar jumys isteıdi. Sapar aıasynda birge kelgen bıznes-delegatsııa ekologııalyq tehnologııalar, energııa tıimdiligi, mashına jasaý jáne ónerkásip sııaqty salalardaǵy yntymaqtastyqty talqylamaq.
– Men qarym-qatynasymyzdaǵy oń dınamıkany jáne zor áleýetti kórip otyrmyn. Sonyń ishinde Qazaqstannyń geosaıası róli men geografııalyq ornalasýy eskerýge turarlyq. Bul saparǵa elimizdiń ishki ister mınıstrimen birge kelip otyrmyn, sondaı-aq búgin Qazaqstannyń ishki ister mınıstrimen kezdesý josparlanǵan. Biz energetıka, saıasat, qaýipsizdik jáne ekonomıka salalaryndaǵy yntymaqtastyq áleýetin tolyq júzege asyrǵymyz keledi, – dedi Beate Maınl-Raızınger QR Syrtqy ister mınıstrliginde ótken brıfıngte.
Spıkerdiń aıtýynsha, kóptegen aýstrııalyqtar úshin Qazaqstan alys el bolyp kórinýi múmkin, biraq shyn máninde ol oılaǵannan áldeqaıda jaqyn.
– Biz Qazaqstanda aýstrııalyq kompanııalardyń belsendi jumys istep jatqanyn atap óttik. Sonymen birge, qaýipsizdik pen energııamen qamtamasyz etý máseleleri mańyzdy bolyp qala beredi. Álem qarqyndy ózgerip jatyr, geosaıası shıelenis kúsheıýde, daǵdarystar men qaqtyǵystar artyp keledi. Kúnnen-kúnge saıası múddeler kelissóz ústelinde emes, urys alańynda sheshilip jatyr. Bul qaýipti úrdis. Bizdiń elderge erejelerge negizdelgen tártip qajet. BUU Jarǵysy sııaqty normalar saqtalýy tıis, al shekaralar kúshpen ózgertilmeýi kerek. Biz qazirgi daǵdarystar men qaqtyǵystardy talqylap, dıplomatııalyq sheshimder qajet ekenin atap óttik, – dedi Aýstrııa federaldyq mınıstri.
Sonymen birge, taraptar Aýǵanstan máselesin de talqylaǵan. Sońǵy ýaqytta ol halyqaralyq kún tártibinde ekinshi orynǵa ysyrylǵanymen, ondaǵy jaǵdaı, ásirese gýmanıtarlyq turǵyda, áli de kúrdeli jáne nazar aýdarýdy qajet etedi, deıdi spıker.
– Biz Qazaqstandy óńirdiń ózindik «seısmografy» retinde qarastyramyz. Ótip jatqan úderisterdi túsiný úshin kórshi eldermen dıalog júrgizý mańyzdy. Bul ózgeristerdi aldyn ala anyqtaýǵa jáne syn-qaterdi baǵalaýǵa múmkindik beredi. Biz turaqtylyqqa, terrorızmmen, ekstremızmmen jáne zańsyz kóshi-qonmen kúreske múddelimiz jáne bul jumysty Qazaqstan sııaqty seriktestermen birge bastaımyz, – dedi B. Maınl-Raızınger.
Búginde Qazaqstan men Aýstrııa saıasat pen qaýipsizdik salalarynda ortaq múddelerge ıe.
– Biz ózara is-qımylǵa, sonyń ishinde halyqaralyq uıymdar arqyly, mysaly, EQYU aıasyndaǵy sharalarǵa úlken mán beremiz. Osyǵan baılanysty erteń Astana áýejaıyndaǵy osy uıym nysanyn aralaımyz, onda aýstrııalyq tehnologııalar Qazaqstan shekarasynyń qaýipsizdigin nyǵaıtýǵa yqpal etýde. Bul – praktıkalyq yntymaqtastyq pen birlesken áreketterdiń naqty mysaly. Energetıka jáne jetkizilimderdiń senimdiligi mańyzdy baǵyt bolyp qala beredi. Qazaqstan energııamen qamtamasyz etýde mańyzdy ról atqarady. Taıaý Shyǵystaǵy shıelenistiń ósýi jaǵdaıynda bul erekshe mańyzǵa ıe. Biz Qazaqstannan munaı alamyz jáne ol kásiporyndardyń jumysyn, dúkenderdiń jabdyqtalýyn jáne kólik qyzmetin qamtamasyz etetin jetkizý tizbekteriniń bir bóligi sanalady. Úzdiksiz jetkizilim kepildigi ózdiginen qalyptaspaıdy. Biz Qazaqstannyń senimdi seriktesi bolyp qala berýdi jalǵastyrýǵa nıettimiz, – dedi Beate Maınl-Raızınger.
Aıta keteıik, Aýstrııa Respýblıkasynyń Eýropa jáne halyqaralyq ister jónindegi federaldyq mınıstri Beate Maınl-Raızınger resmı saparmen Astanaǵa keldi. Sapar aıasynda ol Qazaqstannyń Syrtqy ister mınıstri Ermek Kósherbaevpen kezdesti.
Sonymen birge, Aýstrııa Astana áýejaıyna 25 pasport oqý qurylǵysyn tabystaıdy.
