Qazaqstannan munaı ónimderin áketýge 6 aıǵa tyıym salynady

ASTANA. KAZINFORM – Osy jyldyń 29 naýryzynan bastap Qazaqstan aýmaǵynan munaı ónimderiniń jekelegen túrlerin áketýge alty aı merzimge tyıym salynady.

Қазақстаннан мұнай өнімдерін әкетуге 6 айға тыйым салынады
Фото: ҚР ТЖМ

«Qazaqstan Respýblıkasynyń aýmaǵynan munaı ónimderin áketýdiń keıbir máseleleri týraly» Energetıka mınıstriniń, Ulttyq qaýipsizdik komıteti tóraǵasynyń, Qarjy mınıstriniń, Іshki ister mınıstriniń birlesken buıryǵynyń jobasy ashyq NQA portalynda jarııalandy. Joba munaı ónimderin Qazaqstan Respýblıkasynyń aýmaǵynan, onyń ishinde Eýrazııalyq ekonomıkalyq odaqqa múshe memleketterge áketýge alty aı merzimge tyıym salýdy kózdeıdi.

Energetıka mınıstrliginiń atap ótýinshe, búginde elimizde AI-92 «halyqtyq» avtobenzıni men dızel otynyn tutynýdyń tán emes ósýi baıqalady. Máselen, quqyq qorǵaý organdarynyń aqparaty boıynsha «búrkemelengen taýarlar» túrindegi janar-jaǵarmaıdyń «sur» eksporty men aǵyndarynyń aı saıynǵy kólemi 10-nan 45 myń tonnaǵa deıin jetedi. Bul baǵa aıyrmashylyǵymen baılanysty — Qazaqstanda janar-jaǵarmaı baǵasy kórshiles elderge qaraǵanda 17-166 paıyzǵa tómen.

— Sonymen qatar, Munaı jáne munaı ónimderin jetkizý týraly kelisim aıasynda Qazaqstan Respýblıkasy munaı ónimderin bajsyz jetkizý sharttarynda ımporttaýǵa májbúr jáne tıisinshe, Reseı tarapynyń EAEO-dan tys jerlerge janar-jaǵarmaıdyń keri eksportyna tyıym salý jónindegi talaptary eskeriledi. Osylaısha, «búrkemelengen taýarlar» túrindegi munaı ónimderin, onyń ishinde EAEO-dan tys jerlerge áketýdi baqylaýdy kúsheıtý talap etiledi, — dep atap ótedi mınıstrlikten.

Naýryzdyń 20-na deıin qoǵamdyq talqylaýǵa shyqarylǵan birlesken buıryq 2025 jylǵy 29 naýryzdan bastap qoldanysqa engiziledi.

Aıta ketelik OPEK+ elderi sáýirden munaı óndirý kólemin arttyrýǵa ýaǵdalasqan edi.

Сейчас читают