Qazaqstannan máskeýlikterge qymyz jetkiziledi
ASTANA. QazAqparat - Qazaqstandyqtar jylqynyń qurǵaq sútin Máskeýge eksporttamaq. Bul týraly bizdiń agenttiktiń tilshisine óndirýshi kompanııanyń ókili, ıaǵnı «Evrazııa ınvest LTD» JShS bas dırektorynyń orynbasary Ǵalymjan Meırambekov habarlady.
«Reseıge bıeniń sútin qurǵaq untaq kúıinde tasymaldaýdy bastadyq. Máskeýge aqpannan bastap eksporttaımyz, bul qalada ónimdi saýdalaıtyn bizdiń seriktes bar. Aıyna jarty tonnany jóneltýdi josparladyq, keıinnen bul kólemdi arttyramyz»,-dedi Ǵ. Meırambekov.
Sonymen qatar óndirýshiler búginde bıe sútin Qytaı men Eýropaǵa eksporttaý boıynsha kelissózder júrgizýde.
«Qytaıda birneshe kompanııa óz qyzyǵýshylyqtaryn tanytyp otyr, alaıda bizdi búginde sertıfıkatsııa tusap tur. AShM-men birge bul baǵyttaǵy jumystardy atqaryp jatyrmyz. Al Eýropada osy tektes qurǵaq sút ónimin 30-ǵa tarta kompanııa shyǵarady, ıaǵnı osynda naryq daıyn tur. Biz Germanııadaǵy zerthanaǵa ónimdi teksertken edik, osy oraıda keıbir kórsetkishter boıynsha elimizdiń súti eýropalyqtan asyp tústi. Óıtkeni, bizdiń jylqylar jaıylymǵa shyǵarylyp, túrli shóptesin ósimdiktermen qorektenedi»,-dep naqtylap ótti ol.
Búginde kásiporyn ónimderin Astana men Almatyda ótkizýde.
Onyń sózine qaraǵanda, eýropalyqtar jylqy sútin kosmetıka salasynda keńinen paıdalanyp keledi.
«Jyl saıyn osy kosmetıkanyń kólemi artyp keledi. Qurǵaq sút negizinde bolashaqta kosmetıka óndirýdi josparǵa engizdik», - dedi óndirýshi.
Budan buryn habarlanǵandaı, 2014 jyly Qaraǵandy oblysynyń Osakarov aýdanynda jalpy quny 800 mln. teńgeden asatyn bıe sútinen qurǵaq untaq jasaý óndirisiniń jobasyn júzege asyrý bastalǵan edi. «Evrazııa Invest Ltd» JShS-niń jobasy ishinara «QazAgroQarjy» AQ-nyń nesıelik jelisimen qarjylandyryldy.
