Qazaqstannan Qytaıǵa Evropak fleksıtankasynda raps maıynyń alǵashqy partııasy jóneltildi
Kókshetaý stantsııasynan jóneltilgen raps maıy Qytaıdyń Tıendjın portyna jetkiziledi. Bul Qazaqstannan Qytaıǵa jóneltilip otyrǵan Evropak fleksıtankasynda maıdyń alǵashqy partııasy. Qazaqstan ónimderi úshin Qytaı naryǵy óte áleýetti. Sol sebepti de básekelestik joǵary. Otandyq taýarlardyń artyqshylyǵy kóbinese sapasy men eksporttaýshydan sońǵy alýshyǵa deıin jetkizý jyldamdyǵyna baılanysty. Ásirese, jetkizý jyldamdyǵy mańyzdy faktor bolyp tabylady.
«Barlyǵy 108 konteınerge salynǵan kólemi 2325 tonna raps maıy (108h20fýttyq konteınerler) suıyq júkterdi tasymaldaýǵa arnalǵan yńǵaıly quımaly júkti tógýge arnalǵan polımerlik ıilimdi qap ydystaryna salynǵan», - deıdi «Evropak» jaýapkershiligi shekteýli qoǵamynyń bas dırektory Lıýdvıg Tarhanıan.
Aýyl sharýashylyǵy daqylyn dittegen jerine jetkizýdi «KTZ Express» aktsıonerlik qoǵamynyń Ońtústik fılıaly reseılik «Evropak» kompanııasymen birlesip qolǵa alyp otyr. Konteınerlik poıyz Kókshetaý stantsııasynan Reseıdiń «Lokot – Nahodka» shekara ótkelderi arqyly Qytaıdyń Tıendjın portyna jetkiziledi.
«Fleksıtanktarmen tasymaldaý – ártúrli maılardy, sonyń ishinde raps maıyn tasymaldaýdyń progressıvti ádisteriniń biri. Bul jolǵy raps maıyn tasymaldaý da osy ádis arqyly júzege asyrylady. Fleksıtankti dástúrli tsısternalardyń balamasy dep sanaýǵa bolady», - dep atap ótti «KTZ Express» aktsıonerlik qoǵamynyń basshysy Nurlan Igembaev.
Qytaı-álemdegi raps maıynyń negizgi tutynýshysy. Bul qazaqstandyq kompanııalardan eksporttyq ónimdi jetkizý úshin basym baǵyt. 2020 jylǵy statıstıkalyq derekterge sáıkes, Qazaqstannan Qytaı Halyq Respýblıkasyna 37 myń tonnadan astam osy ónim eksporttaldy.
Nurlan Igembaev atap ótkendeı, «KTZ Express» aktsıonerlik qoǵamy usynǵan tapsyrys berýshiniń talaptaryna sáıkes bul jeke logıstıkalyq sheshim bolashaqta basqa da otandyq óndirýshiler úshin turaqty eksporttyq servıs ornatýǵa múmkindik beredi.
