Qazaqstannan Qytaıǵa bal eksporty jóninde kelisim jasaldy

BEIJІŃ. QazAqparat - 14 mamyr kúni Beıjińde Qazaqstannan Qytaıǵa eksporttalatyn balǵa qoıylatyn Sanıtarlyq talaptar, ınspektsııa jáne karantın jónindegi hattamaǵa qol qoıyldy, dep habarlaıdy QazAqparattyń Qytaıdaǵy menshikti tilshisi.

Qujatqa QR Aýyl sharýashylyǵy vıtse-mınıstri Gúlmıra Isaeva men QHR-dyń Sapany qadaǵalaý, ınspektsııa jáne karantın jónindegi bas basqarmasynyń (SQIKBB) tóraǵasy Chjı Shýpın qol qoıdy.

«Ótken jyldyń jazynda SQIKBB ınspektorlary Qazaqstanda bolyp, Shyǵys Qazaqstandaǵy omartashylarmen kezdesken bolatyn. Olar bizde óndiriletin baldyń alýan túrliligine tańǵalǵan edi», - dep atap ótti QR Aýyl sharýashylyǵy mınıstriniń orynbasary G.Isaeva.

Onyń aıtýynsha, Hattamada buǵan deıin ózara aqyldasyp, zerdelengen barlyq qajetti talaptar qamtylǵan.

«Bul óte mańyzdy. Sebebi bizdiń fermerler qytaılyq naryqtyń talabyn bile otyryp, baldy eksporttaýǵa múmkindik aldy», - dep atap ótti ol.

Kelisim Qazaqstan Prezıdenti Nursultan Nazarbaevtyń Qytaı Halyq Respýblıkasyna sapary barysynda jasaldy.

Búgin Beıjińde «Bir beldeý, bir jol» strategııasy sheńberinde halyqaralyq yntymaqtastyq boıynsha joǵary deńgeıdegi ekikúndik Forým  óz jumysyn bastady. Oǵan 29 memlekettiń jáne 3 iri halyqaralyq uıymnyń (BUU, Dúnıejúzilik bank, Halyqaralyq valıýta qory) basshylary qatysýda.