Qazaqstannan Qytaıǵa astyq eksporty 1 mln tonnaǵa jetýi múmkin
Erbol Qarashókeev AÓK salasyndaǵy ósý men yntymaqtastyqtyń aýqymdy perspektıvalary jáne eki eldiń bıznes-qaýymdastyqtary arasynda tikeleı baılanys ornatý josparlary týraly aıtyp berdi.
Atap aıtqanda, qytaılyq COFCO jáne CITIC Group kompanııalarynyń basshylyǵyna Qazaqstanda astyqtyń edáýir qory bar jáne eksport úshin astyqtyń qajetti kólemi men sapasyn qamtamasyz ete alatyn otandyq kompanııalar arqyly astyq jetkizýdi júzege asyrý usynyldy. Budan bólek, logıstıkada problemalyq máseleler týyndasa AShM olardy jedel sheshýge kómektesýge daıyn. Aıta keteıik, Alashankoý jáne Qorǵas shekaralas qalalarynda táýligine 10 myń tonnaǵa deıin astyq júkterin qabyldaı alatyn termınaldar bar.
Sondaı-aq Erbol Qarashókeev QHR-dyń et qaýymdastyǵynyń ókilderimen kezdesýinde qazaqstandyq kásiporyndar muzdatylǵan sıyr, qoı jáne shoshqa etiniń eksportyn tezirek qalpyna keltirilýin kútetinin atap ótti. Sonymen qatar, otandyq zaýyttar salqyndatylǵan et jáne balyq ónimderi, qus eti, jumyrtqa jáne basqa da taýar túrlerin jetkizýge daıyn.
AShM basshysy QHR-ǵa eksportty kirgizý úshin otandyq et kombınattaryn akkredıtteý múmkindigin talqylady. Qazirgi ýaqytta tek 4 kásiporynnyń tıisti ruqsaty bar, tizimdi taǵy 13 kompanııa tolyqtyra alady.
Aıta keteıik, ótken jyly Qazaqstanda 1,06 mln tonna et óndirilgen. Eksporttyń negizgi úlesi Ózbekstanǵa, BAÁ men Kýveıtke tıesili.
Sonymen qatar, Túrkistan oblysynda táýligine 1500 bas iri qara mal soıý qýaty bar zamanaýı et óńdeý kásiporny men qosalqy ónimderdi qaıta óńdeý zaýytyn salý josparlanǵan. Budan basqa, óńirde aýyl sharýashylyǵy janýarlaryn satý boıynsha iri alań qurý josparlanyp otyr.
