Qazaqstannan Qyrǵyzstanǵa mefedron jetkizip kelgen qylmystyq top ustaldy

BІShKEK. QazAqparat – Qyrǵyzstan polıtseıleri QR UQK birlesken arnaıy operatsııa aıasynda Qazaqstannan Qyrǵyzstanǵa sıntetıkalyq «mefedron» esirtkisin zańsyz tasymaldaıtyn iri arnanyń jumysyn toqtatty, dep habarlaıdy QazAqparattyń menshikti tilshisi Qyrǵyzstan ІІM baspasóz qyzmetine silteme jasap.

Derek boıynsha, esirtki alyp-satarlarynyń qyzmetin joıýǵa baǵyttalǵan birlesken arnaıy operatsııa 6 aı daıyndalǵan.

Jedel izdeý sharalary barysynda Qyrǵyz Respýblıkasy ІІM qyzmetkerleri astanalyq Іshki ister bas basqarmasy arnaıy jasaǵynyń kómegimen buǵan deıin qupııa jerden jalpy salmaǵy 1,194 kg bolatyn, árqaısysy 0,5 lıtrlik 4 plastık bótelke psıhotropty zatty alyp bara jatqan 22 jastaǵy BMW markaly avtokólik mingen jigitti jasyrynbaq bolǵan kezde ustady.

Bul - sıntetıkalyq esirtkiniń 7164 dozasy, baǵasy - 6,5 mln somnan asady.

«Esirtki, psıhotroptyq zattar men olardyń balamalaryn ótkizý maqsatynda zańsyz daıyndaý, satyp alý, saqtaý, tasymaldaý, jóneltý» boıynsha qylmystyq is qozǵaldy.

Ustalǵan azamat Bishkek qalasynyń tergeý ızolıatoryna qamaldy, tergeý júrip jatyr.