Qazaqstannan qýylǵan Tájikstan azamaty atyn ózgertip, qaıtyp kelgen
Atyraý oblysy polıtsııa departamenti 6-12 jeltoqsan aralyǵynda «Mıgrant» jedel-profılaktıkalyq is-sharasyn ótkizý kezinde Qazaqstan Respýblıkasy aýmaǵynan qoǵamdyq orynda mas bolyp júrgeni úshin 5 jylǵa shettetilgen sheteldikti anyqtady.
Tájikstan Respýblıkasynyń 35 jastaǵy azamaty óz eline baryp, jeke basyn rastaıtyn qujattaryndaǵy aqparatty ózgertip, Qazaqstanǵa qaıtyp kelgendigi belgili boldy.
– Atalǵan fakti jedel-profılaktıkalyq is-shara ótkizý kezinde taksı júrgizýshi bolyp jumys istep júrgen Tájikstan azamatynyń qujattaryn tekserý barysynda anyqtaldy. Ustalǵan sheteldik óz kinásin tolyqtaı moıyndady. Qazirgi tańda el shekarasyna zańsyz kirgen er adam 30 táýlikke ákimshilik qamaýǵa alyndy. Іs-qujattar jınaqtalyp, zańdy sheshimin shyǵarý úshin sotqa joldanady, – dedi Atyraý qalalyq polıtsııa basqarmasy kóshi-qon qyzmeti bóliminiń bastyǵy Qadyrbek Ábishov.