Qazaqstannan qonys aýdaratyndar azaıdy — statıstıka

ASTANA. KAZINFORM — Bıyl tórt aıda Qazaqstannan 1700 adam qonys aýdardy. Bul týraly Ranking.kz resýrsy habarlaıdy. 

Resmı málimetke súıensek, 2025 jyldyń qańtar–sáýir aılarynda Qazaqstannan basqa elderge turaqty turý úshin shamamen 1700 adam ketken. Bul ótken jyldyń osy kezeńimen salystyrǵanda 2,8 ese az. 

Bıyl tórt aıda Qazaqstanǵa turaqty turý úshin 8100 adam kelgen. 2024 jyldyń qańtar–sáýirinde bul kórsetkish 9900 bolǵan edi. Ótken jyly elimiz táýelsizdik alǵannan bergi eń tómengi kórsetkish — 12,8 myń adam qonys aýdarǵan. Salystyrmaly túrde alyp qarasaq, 2000 jyly elden 156 myńǵa jýyq adam kóship ketti.

Ótken jyly kóshi-qonnyń 48%-y Qostanaı, Pavlodar jáne Abaı oblysynan, sondaı-aq Soltústik Qazaqstan jáne Shyǵys Qazaqstan oblysynan ketken. Elden ketken azamattardyń 69% Reseıge qonys aýdarǵan. 2025 jyldyń qańtar–naýryz aılarynda Reseıge 644 qazaqstandyq kóshken. Bul ótken jyldyń alǵashqy toqsanymen salystyrǵanda 75,5% az.

2024 jyly Germanııaǵa shamamen 2000 qazaqstandyq qonys aýdarǵan. Al 2025 jyldyń alǵashqy toqsanynda bul baǵyttaǵy emıgratsııa 68%-ǵa tómendegen.

Eske salaıyq, jyl basynda Qazaqstanda demografııa jáne kóshi-qon salasyn retteıtin memlekettik organ qurý usynyldy.