Qazaqstannan kómirdi kólikpen áketýge tyıym salynbaq

ASTANA. QazAqparat – El aýmaǵynan kólikpen kómir áketýge jarty jylǵa tyıym salynýy yqtımal. Bul týraly «Ashyq» NQA portalynda jarııalanǵan Indýstrııa jáne ınfroqurlymdyq damý mınıstriniń buıryǵynda jazylǵan, dep habarlaıdy QazAqparat tilshisi.

«Qazaqstan aýmaǵynan tas kómirdi, tas kómirden alynǵan brıketterdi, shekem tastardy, qatty otynnyń uqsas túrlerin, tozań túrindegi nemese tozań túrindegi emes biraq aglomeratsııalanbaǵan tas kómirdi, gagattan basqa lıgnıtti nemese aglomeratsııalanǵan, aglomeratsııalanbaǵan qońyr kómirdi avtomobıl kóligimen áketýge 6 aı merzimge tyıym salý engizilsin», - delingen buıryqta.

Qujatqa qosymsha berilgen túsindirmede bul halyqty jáne kommýnaldyq-turmystyq sektordy kómirmen qamtamasyz etý jónindegi dúrbeleńdi boldyrmaý jáne eldiń energetıkalyq qaýipsizdigin saqtaý maqsatynda engizilgeni jazylǵan.

Buıryq 14 naýryzǵa deıin kópshilik talqylaýda bolady.