Qazaqstannan kóbine jylyjaıda ósirilgen qyzanaqtar men qııarlar eksporttalady
ALMATY. QazAqparat - Qazaqstannyń joǵarǵy deńgeıde jabdyqtalǵan jylyjaılarynda ósiriletin qyzanaqtar men qııarlar eksportqa jiberilýde. Bul týraly «Jylyjaılar. Kókónis. Sýarý men Gúlder. Almaty-2018» halyqaralyq kórmesinde Qazaqstan jylyjaılar qaýymdastyǵynyń prezıdenti Qanat Qoshman aıtty, dep habarlaıdy QazAqparat tilshisi.
«Zamanaýı óndiristik jylyjaılarda ósirilip jatqan barlyq aýylsharýashylyq jáne kókónis ónimderi eksportqa jiberilýde. Ásirese, Reseı jáne TMD elderine jetkizemiz. Bul ortaq baǵany anyqtaýdyń tıimdi joly. Al eldiń ishki naryǵynyń suranysyna kelsek, ol fermerlik dalalar men jabyq jylyjaılarda ósiriletin kókónis ónimderimen qanaǵattandyrylyp otyr», - deıdi Qazaqstan jylyjaılar qaýymdastyǵynyń prezıdenti Qanat Qoshman.
Onyń aıtýynsha, Qazaqstannyń jylyjaı sektory sońǵy 10 jylda aıtarlyqtaı damyǵan. Fermerler jabyq jylyjaılardy qoldanýdy jón kóredi. Desede, aýyl sharýashylyǵy sektorynyń kóptegen mamandary temperatýralyq sezgishi bar, jaryqpen qamtamasyz etilgen joǵary tehnologııalyq óndiristik parnıkterdi qarastyryp jatyr. Qazaqstandyq fermerler ártúrli tehnologııany paıdalanýda. Kóbine Gollandııanyń tájirıbesine súıene otyryp, jumys isteýde.
«Búgingi tańda, elimizde myńnan astam jylyjaı jumys isteıdi. Onyń ishinde jabyq jylyjaı myń gektardy qamtysa, óndiristik jylyjaıdyń aýmaǵy - 300 gektar. Bul ósimdikterdi bıoqorǵaý, hımııalyq qospalar men tyńaıtqyshtar syndy otandyq sektordaǵy ózge de salalardyń damýyna negiz bolyp otyr. Biz eldiń aýyl sharýashylyq sektoryn damytýda damyǵan elderdiń tájirıbesin qoldanyp kelemiz», - deıdi ol.
Halyqaralyq kórmege Reseı, Italııa jáne Gollandııa syndy ártúrli elderden júzdegen kompanııalar kelip, óz ónimderin usynyp otyr.
«Gollandııalyq kompanııalar jylyjaı sektory boıynsha qazaqstandyq fermerlermen 10 jyldan beri birge eńbek etip keledi. Ázirge, ózara yntymaqtastyq jylyjaılardy jasaý, bıotyńaıtqyshtardy jetkizý men gúl ónimderin eksporttaý syndy kommertsııalyq deńgeıdegi kelissózder esebinde júrýde. Aldaǵy ýaqytta úkimet deńgeıinde yntymaqtasýǵa úmit artamyz. Qazaqstan Nıderlandy Koroldigi úshin aldyńǵy sheptegi elderdiń qatarynda», - deıdi Qazaqstan Respýblıkasyndaǵy Nıderlandy Koroldigi elshisiniń aýyl sharýashylyǵy boıynsha keńesshisi Meýves Braýer.
«Jylyjaılar. Kókónis. Sýarý men Gúlder» halyqaralyq kórmesi Almatyda 10-shy ret ótkizilip otyr jáne 21 sáýirge deıin jalǵasady. 
