Qazaqstannan Qytaıǵa aqsha aýdarymdary rekordtyq mınımýmǵa deıin tómendedi
ASTANA. KAZINFORM — Qazaqstannan Qytaıǵa halyqaralyq aqsha aýdarý júıeleri arqyly jiberiletin qarajat kólemi sońǵy alty jyldaǵy eń tómengi deńgeıge tústi. Bul týraly Data Hub habarlady.
Málimetke sáıkes, aqpanda qazaqstandyqtar Qytaıǵa halyqaralyq aqsha aýdarý júıeleri arqyly 711,8 mln teńge jibergen. Bul sońǵy jyldardaǵy nomınaldy jáne naqty mándegi eń tómengi kórsetkish bolyp otyr.
Ulttyq bank derekterine súıensek, ótken jyldyń sáıkes kezeńimen salystyrǵanda aýdarym kólemi aǵymdaǵy baǵamen 29 paıyzǵa, al ınflıatsııany eseptegende 37 paıyzǵa qysqarǵan.
Sarapshylar muny maýsymdyq faktorlarmen, merekelik kúndermen jáne bul baǵytqa degen qyzyǵýshylyqtyń jalpy tómendeýimen baılanystyrady. Ásirese Qytaı Jańa jyly kezinde uzaq demalystardyń bolýy aýdarym dınamıkasyna áser etken. 2026 jyly merekelik kezeń aqpannyń ekinshi jartysy men naýryzdyń basyna sáıkes keldi.
Sonymen qatar Qytaı Qazaqstannan aqsha aýdarymdarynyń negizgi baǵyty bolyp sanalmaıdy. 2025 jyldyń qorytyndysy boıynsha, bul elge barlyq jiberilgen qarajattyń shamamen 3 paıyzy ǵana tıesili bolǵan.
Salystyryp qarasaq, eń iri baǵyt burynǵysynsha Reseı bolyp qalyp otyr. Onyń úlesi shamamen 31 paıyzdy quraıdy. Aqpan aıynda Reseıge aýdarylǵan qarajat kólemi, kerisinshe, ósip, 19,4 mlrd teńgege jetken. Bul ótken jylmen salystyrǵanda 17 paıyzǵa joǵary.
Jalpy shetelge jiberiletin aqsha aýdarymdarynyń kólemi tómendeýin jalǵastyryp otyr. Barlyq elder boıynsha jıyntyq kórsetkish nomınaldy mánde 6 paıyzǵa, naqty mánde 16 paıyzǵa azaıyp, 42,2 mlrd teńgeni quraǵan.
Sarapshylar Qytaı baǵytynyń róliniń tómendeýi birneshe jyldan beri baıqalyp kele jatqanyn atap ótedi. 2017 jyldan beri onyń úlesi aýdarym qurylymynda shamamen úsh esege qysqarǵan. Bul Qytaıǵa aqsha jiberýde dástúrli aýdarym júıeleriniń tanymaldyǵy tómendegenin kórsetýi múmkin.
Negizgi aýdarym arnalary retinde «Zolotaıa korona», Western Union, MoneyGram jáne ózge de júıeler qalyp otyr. Aqpan aıynda shetelge jiberilgen barlyq qarajattyń shamamen 82 paıyzy «Zolotaıa korona» júıesine tıesili bolǵan.
Aıta keteıik, buǵan deıin Qazaqstan men Qytaı arasyndaǵy taýar aınalymy 48,7 mlrd dollarǵa jetkeni habarlanǵan edi.
Al jýyrda atalǵan eki el arasynda Tsındaoda $125 mln kelisimge qol qoıyldy.