Qazaqstannan Qytaıǵa 1500 kıikti berý protsesi qalaı iske asady

ASTANA. KAZINFORM – Qazaqstannan Qytaıǵa jiberiletin 1500 kıikti kútip-baǵýǵa qatysty otandyq ǵalymdary tıisti tekserýler jasaı alady. Bul týraly QR Ekologııa jáne tabıǵı resýrstar mınıstrligi málim etti.

- Kıikterdi basqa elderge berý protsesi halyqaralyq jáne ulttyq zańnamalarǵa sáıkes, birqatar keshendi rásimdi talap etedi. Bul protsess tek ákimshilik sıpatta emes, sonymen qatar ǵylymı negizdemelerge súıenedi. Eń aldymen, eki taraptyń – jiberýshi jáne qabyldaýshy elderdiń ǵylymı uıymdary bul protseske belsendi qatysýy kerek. Qazaqstan jaǵynan otandyq ǵalymdar kıikterdi basqa elge jiberýdiń bıologııalyq negizdemesin ázirleýi qajet, - delingen mınıstrliktiń Kazinform agenttigine bergen jaýabynda.

Bul negizdeme kıikterdiń popýlıatsııalyq jaǵdaıyn, genetıkalyq ártúrliligin, olardy tasymaldaýdyń yqtımal áserlerin jan-jaqty taldaýdy qamtıdy.

- Óz kezeginde, kıikterdi qabyldaýshy el olardy ary qaraı ustaýǵa qolaıly jaǵdaılar jasaýy tıis. Bul jaǵdaılar kıikterdiń tabıǵı mekendeý ortasyna jaqyn bolýy, olardyń qorektenýine, kóbeıýine jáne aýrýlardan qorǵalýyna qajet ınfraqurylymdy qamtýy kerek. Qazaqstandyq tarap jiberiletin janýarlar úshin barlyq qajet jaǵdaılardyń jasalǵanyna kóz jetkizý maqsatynda tıisti tekserýler men monıtorıng júrgizýge quqyly. Bul qadamdardyń barlyǵy kıikterdiń saqtalýyn qamtamasyz etýge, olardyń jańa ortada sátti beıimdelýine jáne halyqaralyq deńgeıdegi tabıǵatty qorǵaý prıntsıpterine sáıkes kelýine baǵyttalǵan, - dep atalyp ótken vedomstvo aqparatynda.

Eske salsaq, jaqynda Qazaqstan Qytaıǵa 1500 kıikti syıǵa tartatyny málim boldy.

Osy oraıda Ekologııa jáne tabıǵı resýrstar mınıstri Erlan Nysanbaev bul sheshimge qatysty oıyn ortaǵa saldy.