Qazaqstannan Qytaı men Ózbekstanǵa jańa reıster ashylady
ASTANA. KAZINFORM - Qazaqstandyqtardyń shetelge shyǵýyn jeńildetý úshin jańa halyqaralyq baǵyttar ashylyp, vızalyq rejımdi jeńildetý jumystary jalǵasyp jatyr. Bul týraly Kazinform agenttiginiń resmı saýalyna jaýap bergen QR Týrızm jáne sport mınıstrligi Týrızm ındýstrııasy komıteti tóraǵasynyń orynbasary Aıdyn Qapashev aıtty.
Aıdyn Qapashevtyń aıtýynsha, qabyldanyp jatqan sharalar sheteldegi tanymal týrıstik baǵyttarǵa jetýdi jeńildetýge baǵyttalǵan.
– Qazirgi ýaqytta jańa halyqaralyq áýe reısterin ashý, tikeleı ushýlar sanyn arttyrý jáne vızalyq rejımdi jeńildetý boıynsha jumystar júrgizilip jatyr. Bul qazaqstandyqtardyń tanymal týrıstik baǵyttarǵa qoljetimdiligin edáýir arttyrady. Máselen, Air Astana Shanhaı, Gýanchjoý, Larnaka jáne Dalaman baǵyttaryn iske qosyp, Seýlge jáne basqa da halyqaralyq baǵyttarǵa reıster sanyn kóbeıtip jatyr. Al FlyArystan 3 qyrkúıekten bastap Úrgenishke, 23 qyrkúıekten bastap Qytaıdyń Chýntsın qalasyna turaqty halyqaralyq reısterdi ashýdy josparlap otyr, - dedi spıker.
Aıta keteıik, 2026 jylǵy jazǵy týrıstik maýsymda qazaqstandyqtar arasynda eń tanymal sheteldik baǵyttar qatarynda Vetnam, Mysyr, Taıland, Túrkııa, Qytaı jáne Maldıv Respýblıkasy bar.
Aıta keteıik, 2 tamyzdan bastap Tashkent pen Aqtóbe arasynda tikeleı áýe reısi ashylady.
