Qazaqstannan ketip qalǵan «Azııa avto» basshysy Anatolıı Balýshkın sotqa shaqyryldy

ASTANA. QazAqparat – Qazaqstannan qashyp júrgen Anatolıı Balýshkın sotqa shaqyryldy, dep habarlaıdy QazAqparat Qarjylyq monıtorıng agenttigine silteme jasap.

«Qazaqstannan tys jerde júrgen jáne kelýden jaltaryp júrgen kúdikti 1970 jyly týǵan Anatolıı Balýshkın 10 aqpanda saǵat 17:00-ge deıin tergeý amaldaryn júrgizý úshin Óskemen qalasy, Novatorov kóshesi, 7/2 mekenjaıy boıynsha Shyǵys Qazaqstan oblysy boıynsha Ekonomıkalyq tergep-tekserý departamentiniń ákimshilik ǵımaratyna kelýi qajet», - delingen agenttik habarlamasynda.

Tergeý áreketterine qatysý úshin kúdikti Balýshkın A.M. qorǵaýshyny óz betinshe shaqyrýǵa nemese qylmystyq protsesti júrgizetin organnyń qorǵaýshynyń qatysýy týraly ótinishhat berýge (QR QPK-niń 68-baby) quqyly. Qorǵaýshyny kúdikti nemese onyń zańdy ókilderi, sondaı-aq olardyń atynan ózge de adamdar shaqyrmasa, qorǵaýshynyń qatysýyn qylmystyq protsesti júrgizetin organ qamtamasyz etedi (QR QPK-niń 67-baby).

Aıta ketsek, Anatolıı Balýshkın «Azııa avto – BIPEK avto» basshysy bolǵan.