Qazaqstannan qajylyqqa 3 myń adam attandy

ASTANA. QazAqparat - Qazaqstan musylmandary dinı basqarmasynyń tóraǵasy, bas múftı Serikbaı qajy Oraz Astana qalasynyń halyqaralyq áýejaıynan qajylyqqa attanǵandardyń sońǵy legin shyǵaryp saldy, dep habarlaıdy Astana qalasy ákimdiginiń resmı saıty.

QMDB baspasóz qyzmetiniń aqparatynsha, otandastarymyz Astanadan bólek, Almaty, Aqtaý, Shymkent qalalarynan tikeleı reıspen Jıdda, Mádına shaharyna ushýda. Áýe reısterin Qazaqstan tarapynan otandyq «Scat», Saýd Arabııa Koroldiginen «Flynas» áýekompanııalary uıymdastyrady. Ushý ýaqyty 5-6 saǵat. Saýd Arabııa Koroldiginiń Qajylyq mınıstrligi bólgen 3000 kvotaǵa vızalar tolyq shyqty.

QMDB janynan qurylǵan Qajylyq mıssııasy qajylyq saparyn uıymdastyrý-úılestirý jumystaryn jan-jaqty pysyqtap, mıssııa janynan dárigerler, ýaǵyzshylar, aqparat toby qurylyp, árbirine tıisti mindetter júktelgen jáne qatarlarynda tıisti mınıstrlikterdiń ókilderi de bar. Olar qajylardy jan-jaqty aqparatpen, qajylyq barysynda týyndaǵan máseleler bolsa sonyn sheshimin tabýǵa kómek beredi.

«Qazaqstan qajylary uly saparǵa attanbas buryn, menıngıtke qarsy ekpe saldyrdy. Qajylyq saparǵa nıet bildirgen azamattardyń densaýlyǵy tolyq tekserildi. Saýd Arabııada QR Densaýlyq saqtaý mınıstrligi tarapynan usynylǵan dárigerler otandastarymyzdyń densaýlyǵyn jiti qadaǵalaıdy. Dárigerler QMDB qajylyq mıssııasynyń medıtsınalyq kómek kórsetý ortalyǵynda qajylarǵa táýlik boıy qyzmet kórsetedi. Ortalyqta jedel járdem kóligi de bolady. Barlyq qajy otandyq dári-dármekpen qamtamasyz etilgen. Bıyl alǵash ret Qazaqstan qajylary qajylyqqa biryńǵaı kıim úlgisin kıip barady», dedi Bas múftı Serikbaı qajy Oraz.

Aıta ketetin taǵy bir jaıt, uly sapar kezinde qajylarǵa gıdter jol kórsetip, kómekshi bolady jáne ýaǵyz-nasıhat jumystaryna bilikti de bilimdi ımamdar bekitilgen.

Qajylyq saparǵa attanǵan qazaqstandyqtardy shyǵaryp salyp, sát-sapar tilegin jetkizýge áýejaıǵa Saýd Arabııasy Koroldiginiń Tótenshe jáne ókiletti elshisi Zahır ben Mýtısh Ál-Anezı arnaıy kelip, qajylyq saparǵa nıet bildirgen jandarǵa oń sapar tilep, olardyń aman-esen jetip, qajylyqtary jeńil jáne qabyl bolyp, elge aman oralýyna Alla násip etsin degen tilegin bildirdi.

Elshi QR Prezıdentine, QR Úkimetine, Qazaqstan musylmandary dinı basqarmasynyń tóraǵasyna jáne qyzmetkerlerine zor alǵysyn bildirdi.