Qazaqstannan Grýzııaǵa jańa áýe reısi iske qosylady
ASTANA. KAZINFORM — 14 shildeden bastap qazaqstandyq Fly Arystan áýe kompanııasy Atyraý men Batýmı arasynda jańa turaqty áýe reısin iske qosady, dep habarlaıdy Kólik mınıstrligi.
Jańa baǵyt Qazaqstan men Grýzııa arasyndaǵy áýe qatynasyn keńeıtý jáne halyqaralyq reıster sanyn arttyrý jumystary aıasynda ashylyp otyr.
Mınıstrliktiń málimetinshe, reıster aptasyna bir ret — seısenbi kúnderi Airbus A320 áýe kemelerimen oryndalady.
«Jańa baǵyttyń ashylýy Qazaqstan Respýblıkasy men Grýzııa arasyndaǵy týrıstik yntymaqtastyqtyń odan ári damýyna yqpal etedi», — dep atap ótti mınıstrlik.
Kólik mınıstrligi halyqaralyq áýe baǵyttarynyń geografııasyn keńeıtý jáne qoldanystaǵy reısterdiń jıiligin arttyrý baǵytyndaǵy jumysty turaqty túrde jalǵastyryp keledi.
Aıta keteıik, endi Qazaqstan men Japonııa arasynda tikeleı áýe reısi ashylýy múmkin.
