Bıyl Grýzııaǵa barǵan qazaqstandyq týrıster sany artqan
ASTANA. KAZINFORM – 2026 jyldyń alǵashqy alty aıynda Grýzııaǵa 66 526 Qazaqstan azamaty barǵan. Bul ótken jyldyń sáıkes kezeńimen salystyrǵanda 6 paıyzǵa kóp, dep habarlaıdy Kazinform agenttiginiń óńirdegi menshikti tilshisi Business Media basylymyna silteme jasap.
Grýzııanyń Ulttyq týrızm ákimshiliginiń málimetinshe, Qazaqstan respýblıkaǵa kelýshiler sany boıynsha jetinshi orynǵa kóterildi. Aldyńǵy qatarda Reseı, Túrkııa, Armenııa, Izraıl, Ázerbaıjan jáne Ýkraına tur.
Qańtar–maýsym aralyǵynda Grýzııada 2 mln 734 myń 504 halyqaralyq kelýshi tirkelgen. Bul byltyrǵy osy kezeńmen salystyrǵanda 2,7 paıyzǵa az. Degenmen týrıstik maqsattaǵy saparlar sany 0,1 paıyzǵa ósip, 2 mln 272 myń 964-ke jetken.
Týrıster sany eń kóp artqan elderdiń qatarynda Germanııa (26,2%), Ýkraına (22,7%), Polsha (17,4%), Qytaı (16,7%) jáne Qazaqstan (6%) bar.
Kerisinshe, Irannan kelýshiler sany 48,7 paıyzǵa qysqarǵan. Sondaı-aq Izraılden (14,4%), Armenııadan (8%), Ózbekstannan (4%) jáne Túrkııadan (1,5%) kelgen týrıster sany azaıǵan.
Grýzııa tarapy muny Taıaý Shyǵystaǵy ahýaldyń shıelenisýi jáne áýe qatynasyndaǵy irkilistermen baılanystyrady.
Sonymen qatar, Eýropalyq odaq elderinen, onyń ishinde Ulybrıtanııadan kelgen týrıster sany 23 paıyzǵa ósip, 249 201 adamdy qurady.
Buǵan deıin Kazinform agenttigi Grýzııanyń halyqaralyq týrızmnen alty aıda 1,93 mlrd AQSh dollary kóleminde tabys tapqanyn habarlaǵan.
