Qazaqstannan eksporttalatyn taýarlar 23 paıyzǵa qymbattady
ASTANA. QazAqparat - Qazaqstanda shetelge eksporttalatyn taýarlardyń baǵasy 2018 jyldyń qarasha aıynda buǵan deıingi aımen salystyrǵanda 3,5 paıyzǵa, 2017 jyldyń jeltoqsan aıyna qaraǵanda - 23,4 paıyzǵa ósken. Al ımporttalatyn taýarlar sáıkesinshe 0,9 paıyz jáne 8 paıyzǵa ósti. Bul týraly QR Ulttyq ekonomıka mınıstrliginiń Statıstıka komıtetine siltememen «QazAqparat» HAA habarlaıdy.
Ótken jyldyń qańtar-qarashasynda 2017 jyldyń osyndaı kezeńimen salystyrǵanda Qazaqstanda shetelge eksporttalatyn taýarlar 23,5 paıyzǵa, ımporttalatyn taýarlar - 7,2 paıyzǵa artqan.
Jyl basynan beri eksporttyq jetkizilimder baǵasy munaıǵa - 32,2 paıyz, tabıǵı gazǵa - 25,3 paıyz, marganets kenderine - 23,1 paıyz, temir kenderine - 19,7 paıyz, mysqa - 17,1 paıyz, ferroqorytpalarǵa - 14,9 paıyz, qara metall prokatyna - 12,6 paıyz, kómirge - 8,6 paıyz, joǵarylady. Myryshqa kerisinshe, 7,6 paıyz, qorǵasynǵa - 12,4 paıyzǵa tómendedi.
Sondaı-aq baǵanyń arpaǵa - 19,2 paıyz, maqtaǵa - 9,3 paıyz, bıdaıǵa 16,8 paıyzǵa joǵarylaǵany tirkeldi. Júnniń quny 4,2 paıyzǵa arzandaǵan.
Importtalatyn ónimderden jemis jáne jańǵaqtar - 59,4 paıyz, qus eti - 29,2 paıyz, balyq - 15 paıyz, qant -13,4 paıyz, kókónister - 11 paıyz, shaı - 10,1 paıyz, margarın - 4,2 paıyz, farmatsevtıkalyq ónimder - 3,4 paıyz qymbattady. Al kakao 1,6 paıyzǵa arzandaı túsken.
Aıaq kıimder - 27,9 paıyz, qurylys materıaldary - 19,4 paıyz, plastmassa - 13,9 paıyz, toqyma buıymdary - 13,1 paıyz, qaǵaz - 13 paıyzǵa qymbattady.
Avtor: Ashat Ahmetbekov
