Reseı men Belarýske eksporttalatyn kóliktiń ýtılalymy ósti
ASTANA. KAZINFORM — Ýtılızatsııalyq alym stavkalaryndaǵy ózgerister tek Qazaqstanǵa Belarýs Respýblıkasy men Reseı Federatsııasynan ákelinetin avtokólikter men ózdiginen júretin aýyl sharýashylyǵy tehnıkasyna ǵana qatysty bolady. Bul týraly Ónerkásip jáne qurylys mınıstrliginde málimdedi.
— Bul Qazaqstannan Reseı men Belarýske eksporttalatyn avtokólikterge ýtılızatsııalyq alymdy esepteý kezinde atalǵan elderde belgilengen mólsherlemege qosymsha túrde Qazaqstanda tólengen kedendik bajdar, qosylǵan qun salyǵy men aktsızder arasyndaǵy aıyrmanyń alynýymen baılanysty. Alaıda Eýrazııalyq ekonomıkalyq odaqtyń Keden kodeksiniń 454 jáne 456-baptaryna sáıkes, Qazaqstanda óndirilgen avtokólikter EAEO taýarlary. Osyǵan oraı, Belarýs pen Reseıde qazaqstandyq óndiristegi avtokólikterge «kedendik koeffıtsıentterdi» qoldaný zańsyz, — delingen habarlamada.
Al elimizde óndiriletin tehnıkaǵa, sondaı-aq EAEO-ǵa múshe emes memleketterden, Armenııa men Qyrǵyzstannan ımporttalatyn tehnıkaǵa ýtılızatsııalyq alym stavkalary burynǵy deńgeıde saqtalady.
Sonymen qatar Qazaqstan men EAEO seriktesteri arasyndaǵy ýtılızatsııalyq alym stavkalaryndaǵy teńgerimsizdikti joıý maqsatynda reseılik jáne belorýssııalyq tehnıkaǵa arnalǵan ýtılalym mólsheri Reseı Federatsııasynyń zańnamasynda 2025 jylǵy 1 jeltoqsannan bastap belgilengen tólem deńgeıine teńestiriledi.
— Qazaqstanda Belarýs pen Reseı brendterine tıesili aýyl sharýashylyǵy tehnıkasy lıtsenzııalyq kelisimder negizinde óndirilip keledi. Alaıda osy kelisimderdi buza otyryp, elimizge daıyn ónim túrinde jetkizý faktileri bolyp jatyr. Osyǵan baılanysty atalǵan saladaǵy paralleldi jetkizý shemalarynyń jolyn kesý úshin ýtılızatsııalyq alymnyń joǵarylatylǵan mólsherlemesin engizý usynylyp otyr, — dedi mınıstrliktiń baspasóz qyzmeti.
Vedomstvo málimetinshe, Qazaqstan ýtılızatsııalyq alym men ımport salasyndaǵy saıasatyn memleket, bıznes jáne tutynýshylar múddeleriniń teńgerimine negizdeı otyryp, ashyq ári baıypty ekonomıkalyq tásil aıasynda qalyptastyrady. Bul rette otandyq óndiris, EAEO elderinen jáne úshinshi memleketterden ımport úshin boljamdy jáne turaqty rejım saqtalady.
Mundaı ustanym naryqtyń ashyqtyǵyn jáne barlyq qatysýshy úshin túsinikti ári turaqty erejelerdi qalyptastyrýǵa degen umtylysty kórsetedi.
Buǵan deıin 2025 jyly ýtılalymnan el qazynasyna 324 mlrd teńge túskenin jazǵanbyz.