Qazaqstannan birjola kóshetinder úshin jańa talaptar engizildi
ASTANA. KAZINFORM — Qazaqstanda «Qazaqstan Respýblıkasynan tys jerge turaqty turýǵa ketýge arnalǵan qujattardy resimdeý» memlekettik qyzmetin kórsetý qaǵıdalaryna ózgerister engizildi, dep habarlaıdy Kazinform agenttiginiń tilshisi.
Tıisti buıryqqa Іshki ister mınıstri 2026 jylǵy 30 qazanda qol qoıdy.
Qujatqa sáıkes, bul memlekettik qyzmet Qazaqstan azamattaryna, sondaı-aq Qazaqstanda turaqty turatyn sheteldikter men azamattyǵy joq adamdarǵa kórsetiledi.
Qujattardy «Azamattarǵa arnalǵan úkimet» memlekettik korporatsııasy nemese eGov.kz portaly arqyly rásimdeýge bolady. Qyzmet kórsetý merzimi — 20 jumys kúni. Ol úshin 1 aılyq eseptik kórsetkish mólsherinde memlekettik baj tólenedi.
Ózgeristerdiń biri qujattardy qabyldaý tártibine qatysty.
— Qyzmet alýshyǵa anyqtalǵan kemshilikterdi túzetý úshin 15 jumys kúni beriledi. Bul merzim memlekettik qyzmet kórsetý merzimine kirmeıdi jáne odan aspaýy tıis, — delingen qujatta.
Eger ótinish berýshi kórsetilgen merzimde eskertýlerdi túzetse, ótinish qabyldanǵan kún retinde alǵashqy júgingen kúni esepteledi. Al belgilengen merzimde kemshilikter joıylmasa, qujattardy qabyldaýdan bas tartylady.
Ótinishti qaraý kezinde kóshi-qon qyzmeti Ulttyq qaýipsizdik komıteti, Bas prokýratýra, Ádilet mınıstrligi, Qarjy mınıstrligi jáne Qorǵanys mınıstrligi sııaqty ýákiletti memlekettik organdarǵa kelisý úshin suraý jiberedi. Kelisý rásimi 10 jumys kúni ishinde júrgiziledi.
Oń sheshim qabyldanǵannan keıin ótinish berýshi bir jumys kúni ishinde jeke kýáligin, turýǵa yqtııarhatyn nemese azamattyǵy joq adamnyń kýáligin tapsyrý úshin Memlekettik korporatsııaǵa júginýi qajet. Osydan keıin ol turǵylyqty jeri boıynsha tirkeýden shyǵarylady jáne shetelge turaqty turýǵa ketý qujattaryn rásimdeý týraly sheshim beriledi.
Eger ótinish eGov.kz portaly arqyly berilse, qyzmet nátıjesi basshynyń elektrondyq tsıfrlyq qoltańbasymen rastalǵan elektrondyq qujat túrinde jeke kabınetke jiberiledi.
Memlekettik qyzmetti kórsetýden, atap aıtqanda, salyq bereshegi bolǵan, sot aldyndaǵy mindettemeler oryndalmaǵan, azamat merzimdi áskerı qyzmet ótkerip júrgen, qylmystyq qýdalaýǵa alynǵan nemese kórineý jalǵan málimetter usynǵan jaǵdaıda bas tartylýy múmkin.
Buıryq alǵashqy resmı jarııalanǵan kúninen keıin 10 kúntizbelik kún ótken soń kúshine enedi.
Buǵan deıin Іshki ister mınıstrligi shetel azamattary men azamattyǵy joq adamdarǵa jeke sáıkestendirý nómirin (JSN) rásimdeý kezinde olardyń Qazaqstanda zańdy túrde júrgenin tekserýdi usynǵan bolatyn.
