Qazaqstannan bastalǵan velomarafon Parıjde máresine jetti

Osydan bir aıdan astam ýaqyt buryn «Qazaq eli» eskertkishinen bastalǵan biregeı joba jalpy sany 17 adam quraıtyn, arasynda kózi kórmeıtindermen qatar deni saý eriktilerdi de qamtyǵan, rýhy myqty azamattar toby 6 memleket aýmaǵyndaǵy 30 qalany qamtyǵan uzyndyǵy 5 000 kılometr úlken joldan ótti. «Shekteýsiz múmkindikter álemi» uranymen ótken velomarafon bastamashylarynyń aıtýynsha, onyń negizgi maqsaty múmkindikteri shekteýli otandastarymyzdyń bıik murattarǵa jete alatyndaryn kórsetý jáne kópshilikti sportpen udaıy shuǵyldanýǵa ári salaýatty ómir saltyn ustanýǵa shaqyrý boldy. Іs-shara bastalǵannan beri sportshylar joldarynda kezdesken kóptegen jandardan tamasha qoldaý tapty. Germanııada úsh velosıpedshi olarǵa tipti márege deıin qosyla qaldy.

Jobanyń sońǵy bóligi Nojan-sıýr-Marn qalasynda ornalasqan qazaqtyń birtýar qaıratkeri Mustafa Shoqaıdyń músininen bastalyp, áıgili «Týr de Frans» velojarysynyń qorytyndy kezeńi ótetin Elıseı alqaptary dańǵyly men basqa da kóshelerdi qosa alǵanda Parıj aımaǵy men ataqty astananyń aıtýly oryndary arqyly ótti. Batyl sportshylardy qoldaý úshin olardyń qataryna Frantsııadaǵy Qazaqstan Elshisi Jan Ǵalıev pen Frantsııanyń Eýropa jáne syrtqy ister mınıstrligindegi «DiplomaSycles» Velosport áýesqoılary qaýymdastyǵynyń músheleri de qosyldy.

Saltanat qaqpasynyń janynda Elshiligimizde velomarafonshylardy Parıjdiń 8-shi aýdanynyń ákimi Jann D'Oskar, qurmetti senator, Boregar-Levek kommýnasynyń meri, burynǵy kásibı velosıpedshi Alen Nerı, Paralımpııalyq qordyń jetekshisi Alen Sıklıs, qazaqstandyq stýdentter, dıaspora ókilderi, Qazaqstannyń frantsýz dostary, dıplomattar men olardyń otbasylary qýana qarsy aldy.

Elshiniń aıtýynsha,  Kezdesken qıyndyqtarǵa qaramaı, talaı meıirimdi adamdarmen tanysýǵa múmkindik bergen osynaý uzaq joldyń máresinde sizderdi kórýge asa qýanyshtymyz. Osyndaı bastamalar halyqtar men mádenıetterdi shynaıy jaqyndastyra túsedi, ári Qazaqstannyń shet eldegi abyroıyn nyǵaıta túsedi. Astana men Parıjdi qosqan osy velomarafon Qazaqstan men Frantsııa arasyndaǵy Strategııalyq áriptestiktiń 10-jyldyǵy atalyp jatqan kezeńde uıymdastyrylǵany biz úshin erekshe mánge ıe bolyp kórinedi. Sebebi búgingi jeńisterińiz ekijaqty sporttyq jáne gýmanıtarlyq yntymaqtastyqty nyǵaıtýǵa óz úlesin qosty deı alamyz».

Sportshylar úshin Parıjdiń eń kórikti jerlerin tamashalaýǵa múmkindik bergen teplohodpen ekskýrsııa uıymdastyryldy.

Qalalar men elderdi keshe júre, velomarafonshylar zaǵıptardy qoldaý birlestikterimen, sporttyq qaýymdastyqtarmen, jergilikti bılik ókilderimen, júzdegen jáne myńdaǵan adamdarǵa jolyǵyp, óz bastamalarymen álemdi anyq kóre almasań da, namysyń seni aldyǵa súıreý beretindeı aldyńa qoıǵan maqsattan taıynbaı alǵa basýdyń jarqyn úlgisin kórsete bildi. Jobaǵa qatysýshylar barshamyzdy, densaýlyǵy minsizderdi de, múmkindikteri shekteýlilerdi de, armandaryna umtylýǵa, óz qoǵamynyń belsendi músheleri bolýǵa, zaǵıptarǵa qatysty áleýmettik taptaýryndardy joqqa shyǵarýǵa, elimizdiń mádenıeti men zamanaýı jetistikterin nasıhattaýǵa shaqyrady.

Velomarafon jolyndaǵy árbir memlekette Qazaqstannyń dıplomatııalyq ókildikteri otandastaryna saltanatty qabyldaý men jergilikti parasportshylarmen kezdesýler uıymdastyryp, olardyń trassalarda qaýipsiz júrýlerine járdem jasady.

Balalar men jastardy qoldaýdyń «Anashym» qaıyrymdylyq qory 2001 jyly qurylyp, sodan beri negizinen kórý jaǵynan qıyndyqtary bar azamattardyń áleýmettenýimen aınalysady. Osy ýaqyttyń ishinde múmkindikteri shekteýli jandardyń qoǵamnyń tolyqqandy músheleri bolýyna qoldaý kórsetken birtalaı tabysty jobalardy júzege asyryp úlgerdi. Qordyń qamqorlyǵymen 2016 jyly «Shekteýsiz sport» jobasynyń negizi qalanyp, onyń aıasynda zaǵıptar men nashar kóretin azamattardyń qatysýymen «Almaty - Astana» jáne «Almaty - Ystyqkól» baǵyttary boıynsha eki velomarafon ótti.