Qazaqstannan barǵan ınspektsııalyq top Lıvandaǵy bitimgerlerdiń jaı-kúıimen tanysty

ASTANA. QazAqparat - Áskerı daıyndyq departamentiniń bastyǵy general-maıor Almaz Jumakeev bastaǵan ınspektsııalyq top Qazaqstannyń bitimger rotasyn tekserý úshin Lıvan Respýblıkasyna bardy, dep habarlaıdy QazAqparat QR Qorǵanys mınıstrliginiń baspasóz qyzmetine silteme jasap.

Qarýly Kúshter ókilderi jaýapkershilik Qazaqstan bitimger rotasyna júktelgen aýmaqtaǵy ahýalmen, qazaqstandyq bitimgerlerdiń moraldyq-psıhologııalyq jaǵdaıymen tanysyp, qarý-jaraq, oq-dári jáne tasyp shyǵarylǵan múlikterdiń jaı-kúıin tekserdi, bólimshelerdi rotatsııalaý máselelerin aıqyndady.

Aıta keteıik, úsh jarym aıdan beri Qazaqstan bitimger polkiniń qurama bitimger rotasynyń 120 áskerı qyzmetshisi «BUU-nyń Lıvandaǵy ýaqytsha kúshteri» mıssııasynyń úndi batalonynyń quramynda BUU mandatyna sáıkes, óńirdegi beıbitshilik pen qaýipsizdikti saqtaý mindetterin sátti oryndap jatyr.