Qazaqstannan barǵan 5 jasar bala Birikken Arab Ámirlikterinde kóz jumdy - BAQ
ASTANA. 24 sáýir. QazAqparat - Qazaqstannan barǵan 5 jasar bala Shardje (BAÁ) qalasynda qaza tapty. Jergilikti polıtsııanyń bergen aqparatyna súıensek, bala qonaq úıdiń 4 qabatynan qulap ketken.
Bul týraly búgin «Ekspress K» gazetindegi (avtor Pavel Voronın) «Otdyh so smertelnym ıshodom» atty maqalada jazyldy.
3 jáne 5 jasar eki balasy bar otbasy Birikken Arab Ámirlikterine demalysqa kelip, Radisson Blu qonaq úıine toqtaǵan. Habarlanǵandaı, qaıǵyly oqıǵa ótken jumada kóptegen adamdardyń kózinshe bolǵan.
- Bala bas súıegine kelgen zaqymnyń jáne ishki qurylystaryna qan ketý saldarynan kóz jumdy. Ol aýrýhanaǵa barar jerde jedel-járdem kórsetý kóliginiń ishinde úzildi. Qaza bolǵan balanyń ata-anasy qonaq úıden ketip, Dýbaıǵa keldi. Olar qazaqstandyq elshilikpen habarlasyp, endi balanyń máıitin kútýde, - degen jergilikti polıtsııa qyzmetkeri arabııalyq Gulf News gazetine. - Biz áli de oqıǵanyń qalaı bolǵanyn anyqtaý ústindemiz. Múmkin bul ata-ananyń qadaǵalamaýynan bolǵan shyǵar. Oǵan qosa biz qonaq úı bólmesiniń qaýipsizdigin de tekserip jatyrmyz, - dep habarlady 7 Days in Dubai gazetine tártip saqshysy.
Aıta keteıik, ótken jyly Shardje qalasynda osyǵan uqsas birneshe oqıǵa oryn alǵan. Qarasha aıynda 4 bala bıiktikten qulap, kóz jumdy. Osy oqıǵalardan keıin qalanyń mýnıtsıpalıteti qaýly qabyldaǵan bolatyn, soǵan sáıkes 1,2 metr bıiktikte ornalasqan jańa ǵımarattardyń terezeleri tek 10 sm-ge ǵana ashylýy tıis. Sondaı-aq balkondar men dálizderdi qoıma retinde paıdalanýǵa tıym salynǵan.
