Qazaqstannan Bahreınge qyzdardy seksýaldyq quldyqqa jibergen kúdiktiler ustaldy

NUR-SULTAN. QazAqparat – QR Іshki ister mınıstrligi Tergeý departamentiniń basshysy Sanjar Ádilov Bahreınde seksýaldy eksplýatatsııa maqsatynda qyzdardyń saýdasymen aınalysqan qylmystyq topqa qatysty tergeý barysyn aıtty, dep habarlaıdy QazAqparat tilshisi.

Belgili bolǵandaı, qylmystyq toptyń quramynda Qazaqstan, Reseı jáne Bahreın azamattary bolǵan. Olar 2016-2020 jyldar aralyǵynda elimizdiń aýmaǵynda qyzdardy aldap, Bahreın Koroldigine alyp shyǵýmen aınalysqan.

«Jalpy, zardap shekken 39 adamdy anyqtadyq, olar Shymkent qalasy men Túrkistan oblysynyń turǵyndary. Qazirgi kezde qylmystyq is boıynsha kúdikti retinde 19 adam tanyldy. Olardyń arasynda úsheýine izdeý jarııalandy», - dedi S. Ádilov onlaın rejımdegi brıfıngide.

Onyń aıtýynsha, sońǵy eki aptada Qazaqstannyń 6 azamatynyń sheteldegi turǵylyqty jeri anyqtaldy, osyǵan deıin olardy da seksýaldy quldyqta ustaý úshin shetelge shyǵarǵan.

«Syrtqy ister mınıstrligi, Bas prokýratýramen ózara is-qımyl nátıjesinde qyzdar Bahreınnen, Túrkııadan jáne BAÁ-den qaıtaryldy. Bizde transulttyq uıymdasqan qylmystyq topty qurý men basqarý boıynsha qosymsha qylmystyq is qozǵaldy. Jaqyn arada qylmystyq isti tergeý aıaqtalady, aıyptaý aktisimen sotqa joldanady», - dedi Sanjar Ádilov.

Onyń sózine qaraǵanda, anyqtalǵan barlyq jábirlenýshi elimizge qaıtaryldy. Olarǵa qandaı da bir qaýip tónip turǵan joq.

Eske sala keteıik, byltyr kúzde seksýaldyq quldyq úshin Qazaqstannan Bahreınge qyzdardy jetkizgen qylmystyq toptyń áreketi áshkere boldy.

Qylmyskerler adamdardyń senimine kirip, shetelde kóp aqsha tabýǵa bolatyny jóninde ótirik sózge sendirgen. Boıjetkender keliskennen keıin olardyń qujatyn rásimdeý, zardap shegýshilerdi, onyń ishinde kámeletke tolmaǵandardy zańdy jolmen Bahreın Koroldigine alyp shyǵýdy uıymdastyrǵan.