Qazaqstannan baǵa jetpes jádigerler syrtqa áketilgen
ASTANA. KAZINFORM — Qazaqstannan baǵa jetpes jádigerler syrtqa shyǵarylǵan. Bul jaıynda Bas prokýratýra janyndaǵy aktıvterdi qaıtarý komıtetiniń tóraǵasy Nurdáýlet Súıindikov Jibek Joly telearnasynyń «Qaıtarylýy tıis» derekti fılminde aıtty.
Elimizdegi jáne odan tysqary jerge shyǵarylǵan aktıvterdi qaıtarýǵa baǵyttalǵan kúrdeli protsess bastaldy.
Osyǵan oraı Bas prokýratýra halyqaralyq yntymaqtastyq aıasynda túrli elge múlikterdi buǵattaý jáne tárkileý boıynsha suranys ta jiberip otyr.
Mundaı elderdiń qatarynda AQSh, Ulybrıtanııa, Monako, Ispanııa, Italııa, BAÁ jáne ózge de elder bar.
«Birinshi kezekte bul sán-saltanaty kelisken jyljymaıtyn múlikter — vıllalar, qymbat turǵyn úı keshenindegi apartamentter, qymbat avtomobılder, qonaq úıler, bıznes ortalyqtary. Olar — 1 mln, tipti, keı jaǵdaıda 1 mlrd teńge bolatyn zergerlik buıymdar men brend zattar. Baǵalaý júrgizdik, birneshe júzdegen mln, tipti odan da qymbat turatyn brend zattar bar. Bul lıýks bóligine qatysty. Biraq, munan bólek, buǵan deıin aıtqanymdaı qazirdiń ózinde qaıtarylǵan jáne qaıtarý protsesinde turǵan túrli ken oryndary bar. Memleketke monopolısterden kásiporyndar, 10 myń gektardan astam jer qaıtaryldy», — deıdi Nurdáýlet Súıindikov.
Onyń aıtýynsha, sonymen qatar tarıhı-mádenı mura jádigerleri de qaıtarylǵan. Sarapshylar olardyń shynaıy baǵasyn bere almaı otyr.
«Sot protsesine jumyldyrylǵan sarapshylardyń pikirinshe, bizdiń dáýirimizge deıin jasalýy múmkin zattar jaıynda sóz bolýy yqtımal. Sondyqtan da osynaý tarıhı-mádı muranyń biregeı jádigerleri memleketke qaıtarylǵannan keıin mýzeılerimizge beriletin shyǵar», — dedi ol.
