Qazaqstannan BAÁ, Qatar, Saýd Arabııasyna barǵan 4 myńnan astam týrıst bar
ASTANA. KAZINFORM – «Týrıstik Qamqor» korporatıvtik qory Taıaý Shyǵystaǵy ahýalǵa baılanysty qazaqstandyq týrısterdiń qaýipsizdigin qamtamasyz etý jóninde túsinik berdi.
- Birneshe elden qazaqstandyq týrısterdi qaıtarý qıyndady. Birikken Arab Ámirlikterinde 2,5 myńnan astam adam qalyp otyr, olardyń bárinde týrkodtary bar. Osy adamdardyń barlyǵyn «Týrıstik Qamqor» korporatıvtik qory týrıstik operatorlarmen birigip, qonaqúılerge ornalastyrdy. Eshkimdi dalada qaldyrmadyq, - dedi «Týrıstik Qamqor» korporatıvtik qorynyń dırektory Asylhan Esilov.
Onyń aıtýynsha, Saýd Arabııasynda 200-den astam týrıst saparmen júr. Olardyń bári qazir qonaqúılerde.
- Munymen qosa, Qatarda 1 myńnan astam qazaqstandyq týrıst tirkeldi. Atap aıtqanda týrkody bar týrısterge qolaıly jaǵdaı jasalǵan. Eshkimdi qaldyrmaımyz, olardyń jaǵdaıyn baqylaýda ustap turmyz, - dedi korporatıvtik qor dırektory.
Sonymen qatar ol áýe kompanııalary óz mindettemelerin oryndaýǵa ázir ekenin, alaıda áýe kóligimen saparlaý qaýpi seıilmegenin atap ótti.
«Týrıstik Qamqor» korporatıvtik qorynyń málimetine qaraǵanda, týrkodpen barǵan týrıster qonaqúımen qamtamasyz etiledi, al óz kúshimen saparlaǵandarǵa mundaı jeńildikter qarastyrylmaǵan.
Buǵan deıin habarlanǵandaı, AQSh pen Izraıldiń Iranǵa jasaǵan shabýyldary Taıaý Shyǵys elderindegi jáne odan tys aımaqtardaǵy áýe qatynasyn buzdy.
