Qazaqstannan Ázerbaıjanǵa týrıstik aǵym 20%-ǵa artty

ASTANA. KAZINFORM –  Qazaqstandyq týrısterdiń Ázerbaıjanǵa kelýi ótken jylmen salystyrǵanda 20,6%-ǵa ósti. Qazaqstan bul kórsetkish boıynsha 7-oryndy ıelenip, elge kelgen jalpy týrısterdiń 4%-yn qamtamasyz etti. Mundaı derekterdi Ázerbaıjannyń Memlekettik statıstıka komıteti jarııalady, dep habarlaıdy Kazinform tilshisi. 

Málimetke súıensek, 2025 jylǵy qańtar–shilde aralyǵynda Ázerbaıjanǵa álemniń 182 elinen 1 mıllıon 477,9 myń sheteldik kelgen. Bul 2024 jyldyń sáıkes kezeńimen salystyrǵanda 1,7%-ǵa az.

Qazaqstan azamattarynyń qyzyǵýshylyǵy aıqyn ósip otyr. Olardyń sany ótken jylmen salystyrǵanda 20,6%-ǵa kóbeıgen. Bul TMD elderi ishinde eń joǵary ósimderdiń biri.

Ázerbaıjanǵa eń kóp kelgen elder qatarynda Reseı, Túrkııa, Úndistan, Iran, Saýd Arabııasy jáne Grýzııa bar. Sonymen qatar, týrıster sany Tájikstannan, Izraılden, Qytaıdan, Japonııadan, Qyrǵyzstannan, Iordanııadan jáne Ózbekstannan da artqan.

Kóbine týrıster ushaqpen jetken — olardyń úlesi 75,5%. Temirjol jáne avtokólik arqyly kelgender 23,1%, al teńiz jolyn tańdaǵandar 1,4% boldy.

Sarapshylardyń pikirinshe, Qazaqstannan Ázerbaıjanǵa týrızmniń ósýi eki el arasyndaǵy saıası dıalogtyń nyǵaıýymen, mádenı jaqyndyqpen jáne iskerlik baılanystardyń artýymen baılanysty. Tikeleı áýe reısteri, jeńildetilgen vızalyq rejım jáne tarıhı-tildik uqsastyq saparlardy odan saıyn yńǵaıly ári tartymdy etedi.

Ázerbaıjan qazaqstandyqtar úshin demalys, medıtsınalyq týrızm jáne bıznes is-sharalarǵa barǵan saıyn tanymal baǵytqa aınalyp keledi. Baký, Gánja, Shekı, Lıankıaran syndy qalalar tabıǵatymen, sáýletimen jáne zamanaýı ınfraqurylymymen qyzyqtyrady.

Al Ázerbaıjan azamattarynyń shetelge shyǵý kórsetkishi sál tómendegen. Týrısterdiń 40,6%-y Túrkııany, 15,7%-y Reseıdi, 11,2%-y Grýzııany, al 8,9%-y Irandy tańdaǵan. Grýzııaǵa saparlar sany bir jylda 26%-ǵa ósti. Qalǵan 23,6% úleske Eýropa, Taıaý Shyǵys jáne Azııa elderi tıesili.

Buǵan deıin jarty jyldyń ishinde Qazaqstan men Ózbekstannan kelgen 68 myńnan astam týrıstiń Ázerbaıjandy tańdaǵany habarlanǵan bolatyn.