Qazaqstannan Aýǵanstanǵa 36 gýmanıtarlyq kómek vagony jetkizildi
ASTANA. KAZINFORM — Memleket basshysynyń tapsyrmasy boıynsha Qazaqstan Aýǵanstan halqyna gýmanıtarlyq kómek joldap otyr, dep habarlaıdy Úkimettiń baspasóz qyzmeti.
— Aýǵanstannyń Balh provıntsııasyndaǵy Haıraton stantsııasynda gýmanıtarlyq júk aýǵan tarapyna berildi. Temir jolmen jetkizilgen júktiń jalpy kólemi 2,2 myń tonna. Bular ósimdik maıy, bıdaı uny, kúrish jarmasy, qysqy jáne jazǵy shatyrlar, kórpeler. Zárý dárilik zattar bar gýmanıtarlyq kómektiń bir bóligi áýe kóligimen jiberilmek. Gýmanıtarlyq kómek «KazAID» Qazaqstandyq halyqaralyq damý agenttiginiń járdemimen kórsetildi, — delingen habarlamada.
Qazaqstan Respýblıkasynyń Aýǵanstandaǵy ýaqytsha senimdi ókili Ǵazız Aqbasov atap ótkendeı, Qazaqstan aýǵan halqyn qoldaýdy jalǵastyryp, eki el arasyndaǵy dostyq, saýda-ekonomıkalyq baılanysty damytýdy dáıekti túrde qoldaıdy. Tek gýmanıtarlyq qana emes, taý-ken ónerkásibi, kólik, logıstıka men aýyl sharýashylyǵy salasyndaǵy yntymaqtastyqty tereńdetýge daıyn.
21–23 sáýir aralyǵynda vıtse-premer — ulttyq ekonomıka mınıstri Serik Jumanǵarın bastaǵan qazaqstandyq delegatsııa Kabýlǵa barady. Sapar sheńberinde Aýǵanstannyń resmı tulǵalarymen kezdesýler, qazaqstandyq taýarlardyń kórmesin ótkizý josparlanyp otyr.
Buǵan deıin habarlanǵandaı, Qazaqstan Aýǵanstanǵa temirjol qurylysy materıaldaryn jetkizýi múmkin.