Qazaqstannan alǵash ret qos karateshi álemde jyl úzdigi atandy

ASTANA. KAZINFORM — Marokko astanasy Rabatta karateden Premer-lıga sanatyndaǵy jyldyń qorytyndy týrnıri máresine jetti.

Qazaqstan karate federatsııasynan málim etkenindeı, bıylǵy 4 jarystyń nátıjesinde óz salmaǵyndaǵy reıtıngte kóp upaı jınaǵan otandastarymyz Móldir Jańbyrbaı (-50 kg) men Ásel Qanaı (-61 kg) úzdik sportshyǵa beriletin Grand Winner atalymyna ıe boldy.

Osyǵan deıin ulttyq quramanyń 2 sportshysy qatar mundaı marapatqa ıe bolmaǵan.

Móldir Jańbyrbaı byltyr tuńǵysh ret 50 kelige deıingi salmaqta Grand Winner júldesin jeńip alǵan edi. Ol — Qazaqstannan osy syılyqty 2 márte ıelengen alǵashqy karate sheberi.

Móldir bıyl Parıj qalasynda ótken alǵashqy Premer-lıga básekesinde qola, Hanchjoýda kúmis, Kaırde altyn medalǵa qol jetkizdi. Ásel Parıj ben Kaırde kúmis, Hanchjoýda qola medal oljalaǵan.

Sonymen qatar bıyl osy ataqtan Tokıo Olımpıadasynyń qola júldegeri Sofıa Berýltseva da úmitti boldy. Alaıda komanda kóshbasshysy Rabatta toptyq kezeńnen shyǵa almaı, upaı sany jaǵynan qarsylasyn qýyp jete almady.

Eske sala keteıik, budan buryn Marokkoda karateden ótetin premer-lıga jarysyna qatysatyn Qazaqstan quramasy anyqtalǵanyn jazǵan bolatynbyz.