Qazaqstannan 2026 jylǵy fýtboldan álem chempıonatyna barý quny qansha
ALMATY. KAZINFORM – Erteń, 11 maýsymda 2026 jylǵy fýtboldan álem chempıonaty bastalady. Kazinform tilshisi dál qazir jolǵa shyǵýdy josparlaǵan qazaqstandyq jankúıer úshin Mýndıal matchtaryna barý qansha qarajat qajet ekenin eseptep kórdi.
Álem chempıonaty qaıda ótedi
2026 jylǵy álem chempıonatyn AQSh, Kanada jáne Meksıka birlesip qabyldaıdy. Týrnır matchtary úsh eldegi 16 qalada ótedi: onyń ekeýi Kanadada, úsheýi Meksıkada, qalǵan 11-i AQSh-ta ornalasqan.
Batys aımaqqa Vankýver, Sıetl, San-Frantsısko jáne Los-Andjeles kiredi. Ońtústik aımaqta Mehıko, Gvadalahara, Monterreı, Hıýston, Dallas jáne Kanzas ornalasqan. Al shyǵys aımaqta Toronto, Boston, Fıladelfııa, Nıý-Iork, Nıý-Djersı, Maıamı jáne Atlanta bar.
Qazaqstannan 2026 jylǵy álem chempıonatyna barýdyń shamamen qansha turatynyn esepteý úshin úsh matchty mysalǵa aldyq. Birinshisi – 19 shildede AQSh-tyń Nıý-Djersı shtatyndaǵy Ist-Raterford qalasynda ótetin fınaldyq kezdesý. Ekinshisi – 17 maýsymda Mehıkoda josparlanǵan Ózbekstan quramasynyń toptyq kezeńdegi alǵashqy oıyny. Úshinshisi – 7 shildede Vankýverde ótetin 1/8 fınal matchy.
Match bıletteri
Álem chempıonatyna barýdy josparlaǵan jankúıer úshin eń mańyzdy máseleniń biri – match bıletin tabý. Tórtjyldyqtyń basty fýtbol dodasynyń bastalýyna sanaýly ýaqyt qalsa da da, keıbir matchtarǵa bılet tabýǵa bolady.
FIFA bólgen resmı bıletterdiń basym bóligi áldeqashan satylyp ketken. Sondyqtan jankúıerler bıletterdi resmı qaıta satý platformasy (reseıl) nemese mamandandyrylǵan platformalar arqyly satyp ala alady.
Aldyn ala bılet alǵan jankúıerler ony match bastalǵanǵa deıin qaıta satýǵa qoıa alady. Qazirgi tańda qajetti oıyndarǵa Ticombo nemese TicketKosta sııaqty platformalar arqyly bılet tabýǵa múmkindik bar.
2026 jylǵy álem chempıonaty tarıhtaǵy eń qymbat týrnırlerdiń biri sanalady. Joǵary suranys pen dınamıkalyq baǵa júıesiniń áserinen qaıtalama naryqtaǵy bılet quny bastapqy baǵadan birneshe ese joǵary bolýy múmkin.
Mysaly, fınaldyq match bıletteri birneshe myń dollardan bastalsa, VIP-paketterdiń quny ondaǵan myń dollarǵa deıin jetedi. Toptyq kezeń oıyndaryna qarapaıym oryndarǵa arnalǵan bıletterdi 180 dollardan bastap tabýǵa bolady.
Alaıaqtardyń qurbany bolmaý úshin bıletterdi tek senimdi ári resmı kepildik beretin platformalar arqyly satyp alǵan jón. Mundaı servıster bılet túpnusqalyǵyn rastaýmen qatar, qajet jaǵdaıda qarajatty qaıtarý múmkindigin de usynady.
Vıza
2026 jylǵy álem chempıonaty matchtaryna tamashalaý úshin Qazaqstan azamattaryna standartty kirý vızasyn rásimdeý qajet. Týrnırge aıasynda jankúıerlerge arnalǵan arnaıy nemese biryńǵaı vıza qarastyrylmaǵan. AQSh-ta ótetin matchtarǵa barý úshin B1/B2 týrıstik vızasy kerek. Qazaqstan azamattaryna bul vıza ádette birden 10 jyl merzimge beriledi. Kanadada ótetin oıyndardy kórý úshin Visitor Visa (Temporary Resident Visa), al Meksıkaǵa saparlaý úshin týrıstik vıza rásimdelýge tıis. Degenmen qolyńyzda AQSh nemese Kanadanyń jaramdy kóp mártelik vızasy bolsa, Meksıkaǵa bólek vıza almaı-aq, kirýge múmkindik bar.
Vıza rásimdeý merzimi elge jáne Astana men Almatydaǵy konsýldyqtardyń júktemesine baılanysty ózgeredi. AQSh vızasyn alý úshin mindetti túrde áńgimelesýden ótý qajet. Qazir Qazaqstanda suhbatqa jazylý kezegi shamamen 1,5-3 aıǵa sozylady. Ótinish maquldanǵan jaǵdaıda pasporttaǵy vıza ádette 2-3 jumys kúni ishinde daıyn bolady. Jankúıerdiń FIFA arqyly resmı satyp alynǵan bıleti bolsa, FIFA PASS júıesi arqyly suhbatqa basymdyqpen jazylý múmkindigin qarastyrýǵa bolady. Konsýldyq alym (MRV fee) – 185 AQSh dollary.
Kanada vızasy úshin suhbat talap etilmeıdi, biraq ótinish berýshi VFS Global vızalyq ortalyǵynda bıometrııalyq derekterin tapsyrýy qajet. Qujattardy qaraý merzimi – orta eseppen 6-12 apta (1,5-3 aı). Ótinishti qaraý úshin 100 Kanada dollaryn tóleý kerek, al bıometrııa – 85 CAD. Jalpy quny – 185 CAD (shamamen 135 AQSh dollary).
Meksıka vızasyna qujat tapsyrý úshin Astanadaǵy elshilikke jazylý birneshe aptadan bir aıǵa deıin sozylýy múmkin. Vıza 5-10 jumys kúni ishinde rásimdeledi. Konsýldyq alym – 53 AQSh dollary.
Osylaısha, AQSh nemese Kanada vızasy bar qazaqstandyqtar Ózbekstan quramasynyń matchyn kórý úshin Meksıkaǵa kirý máselesi týyndamaıdy. Al pleı-off kezeńindegi oıyndarǵa barýdy josparlaǵan jankúıerlerdiń qabyldaýshy elderdiń vızasyn alyp úlgerýine áli de múmkindik bar.
Áýe bıletteri
Matchqa bılet alynǵannan keıin Soltústik Amerıkaǵa ushatyn reısterdi izdeý kerek.
Qazaqstannan álem chempıonatyn qabyldaıtyn elder arasynda tike áýe reısteri joq bolǵandyqtan, jankúıerlerdiń keminde bir márte aýysyp otyrý arqyly ushýyna týra keledi.
10 maýsymdaǵy jaǵdaı boıynsha Almatydan kórsetilgen baǵyttarǵa ekonom-klaspen baryp-qaıtý bıletteriniń baǵasy tómendegideı:
• Almaty – Mehıko (15 maýsymda ushý, 18 maýsymda qaıtý): Frankfýrt arqyly – 630 myń teńgeden (1 291 dollar), Ystanbul arqyly – 1,3 mln teńgeden (2 665 dollar);
• Almaty – Vankýver (6 shildede ushý, 8 shildede qaıtý): Frankfýrt arqyly – 585 myń teńgeden (1 200 dollar), Ystanbul arqyly – 578 myń teńgeden (1 179 dollar);
• Almaty – Nıý-Iork (18 shildede ushý, 20 shildede qaıtý): Dýbaı arqyly – 816 myń teńgeden (1 600 dollar), Ystanbul arqyly – 875 myń teńgeden (1 800 dollar).
Qonaqúı
Álem chempıonaty ótetin qalalardan match kúnderi bos qonaqúı tabý ońaı emes. Al arzan nusqany izdeý odan da qıyn.
Soǵan qaramastan, 10 maýsymdaǵy jaǵdaı boıynsha bir adamǵa arnalǵan mynadaı usynystar bar:
• Mehıko (16-18 maýsym): qarapaıym stýdııa – eki túnge 167 dollardan, tolyqqandy qonaqúı nómiri – 330 dollarǵa deıin.
• Vankýver (6-8 shilde): qarapaıym stýdııa – eki túnge 177 dollardan, qonaqúı nómiri – 913 dollarǵa deıin.
• Nıý-Djersı – Nıý-Iork (18-20 shilde): ortaq bólmedegi tósek orny – 184 dollardan, qonaqúı nómirleri – 2 myń dollarǵa deıin. Bul kúnderi óńirdegi nómirlerdiń shamamen 78%-y brondalyp qoıǵan.
Jalpy shyǵyn
Tek bir matchqa baryp-qaıtý saparyn esepke alsaq, vıza, match bıleti, qonaqúı jáne áýe bıletterin qosqanda aıtarlyqtaı qomaqty qarajat qajet bolady.
Almatydan Mehıkoǵa baryp, Ózbekstan – Kolýmbııa matchyn tamashalaý (Meksıka vızasyn qosa eseptegende) bir adamǵa keminde 1 691 dollar nemese shamamen 825 myń teńge qajet.
Vankýverdegi 1/8 fınal matchyn kórý (Kanada vızasymen birge) bir adamǵa keminde 1 692 dollardy nemese shamamen 825 myń teńgeni qajet etedi.
Al Almatydan álem chempıonatynyń fınalyna barý úshin bir adamǵa keminde 3 969 dollar, ıaǵnı shamamen 1,9 mln teńge qarajat kerek.
Biz birneshe matchty qatar kórýge arnalǵan sapar qunyn eseptegen joqpyz. Degenmen mundaı «raýnd-trıptiń» baǵasy bir oıynǵa arnalǵan shyǵynnan áldeqaıda joǵary bolatyny anyq.
Kez kelgen saıahattaǵydaı munda da bir qaǵıda ózgermeıdi: neǵurlym erte brondasańyz, soǵurlym arzanǵa túsedi.
Mýndıalǵa saparyn aldyn ala josparlaǵan jankúıerler aqsha men ýaqytty edáýir únemdedi. Al sońǵy sátte bılet izdegender suranystyń kúrt artýyna baılanysty áýe bıletteri, qonaqúı jáne match bıletteri úshin áldeqaıda qymbat tóleýge májbúr bolady.
Eske salaıyq, buǵan deıin bıylǵy fýtboldan álem chempıonaty týraly negizgi derekter týraly jazǵanbyz.
