Elimizden 18 sportshy 2026 jylǵy jasóspirimder Olımpıadasyna shaqyrtý aldy
ASTANA. KAZINFORM – Qazaqstan quramasy 2026 jyly Senegaldyń Dakar qalasynda ótetin jazǵy jasóspirimder Olımpıadasynda sporttyń 11 túri boıynsha qatysý múmkindigine ıe boldy.
Ulttyq olımpıadalyq komıtettiń málimetinshe, qazirgi tańda 2026 jylǵy jasóspirimder Olımpıadasyna qatysýshylardyń tizimine Qazaqstannan 18 sportshy endi.
Taekvondo
– 63 keliden joǵary, qyzdar
Jaǵajaı voleıboly
– komanda, uldar (2 sportshy)
Tas joldaǵy velosport
– toptyq jarys, uldar jáne qyzdar
– jekeleı jarys (jekeleı ýaqytqa), uldar jáne qyzdar
Trıatlon
– jekeleı sprınt, uldar
Semserlesý
– qylysh, uldar
Breıkıng
– qyzdar
Boks
– 70 kelige deıin, uldar
– 54 kelige deıin, qyzdar
– 57 kelige deıin, qyzdar
Dzıýdo
– 52 kelige deıin, qyzdar
Júzý
– 100 metr erkin stıl, uldar
– 50 metr arqamen júzý, qyzdar
Sporttyq gımnastıka
– jekeleı kópsaıys, uldar jáne qyzdar
Jeńil atletıka
– dısk laqtyrý, uldar
– 400 metr kedergiler arqyly júgirý, qyzdar
Aıta keteıik, berilgen joldamalar naqty sportshylardyń atyna bekitilmegen. Qazirgi ýaqytta ulttyq federatsııalar tarapynan qatysýǵa resmı rastaý kútilýde.
Olımpıada joldamalaryn bólý 1-6 sáýir aralyǵynda Halyqaralyq Olımpıadalyq komıteti bekitken qatysý qaǵıdalaryna sáıkes, halyqaralyq federatsııalarmen birlesip júrgiziledi. Osy kezeń aıaqtalǵannan keıin joldamalardy qaıta bólý qarastyrylǵan, ol 2026 jyldyń 23 mamyryna deıin jalǵasady. Sonyń qorytyndysy boıynsha jas olımpıadashylardyń tolyq quramy anyqtalady.
Aıta keterligi, Dakarda (Senegal) ótetin dúbirli doda tarıhtaǵy tórtinshi jazǵy jasóspirimder Olımpıadasy bolmaq jáne alǵash ret Afrıka qurlyǵynda uıymdastyrylady.
Buǵan deıingi Olımpıadalardan aıyrmashylyǵy - 2026 jyly dástúrli irikteý jarystary ótkizilmeıdi. Onyń ornyna joldamalar Halyqaralyq Olımpıadalyq komıteti men halyqaralyq federatsııalar arqyly bólinedi.
Jarystyń jabylý saltanaty ótetin sátte qatysýshylardyń jasy 17 jastan aspaýy tıis. Al eń tómengi jas shegin árbir halyqaralyq federatsııa óz talaptaryna sáıkes jeke belgileıdi.
Jasóspirimder Olımpıadasy Dakarda 31 qazan men 13 qarasha aralyǵynda ótedi.
Budan buryn qazaqstandyq sportshylarǵa Olımpıadaǵa daıyndyq úshin 2 500 dollardan tólengenin jazǵan edik.
