Qazaqstannan 150-den astam sportshy VI Dúnıejúzilik kóshpendiler oıyndaryna qatysyp jatyr
BІShKEK. KAZINFORM - Qyrǵyzstandaǵy «Bishkek Arena» stadıonynda ótip jatqan VI Dúnıejúzilik kóshpendiler oıyndarynyń ashylý saltanatynda Qazaqstan sportshylary sherýge qatysty. Bul týraly Kazinform agenttiginiń Bishkektegi menshikti tilshisi habarlaıdy.
Qazaqstan ulttyq quramasynyń tý ustaýshysy, kókpardan ulttyq komandanyń kapıtany Qurmanbek Turǵanbek Bishkektegi Oıyndardyń ashylý saltanaty joǵary deńgeıde uıymdastyrylǵanyn atap ótti.
-VI Dúnıejúzilik kóshpendiler oıyndarynyń ashylý saltanaty óte joǵary deńgeıde ótip jatyr. Sharaǵa 20-ǵa jýyq memlekettiń basshysy qatysyp otyrǵanyn jáne álemniń 112 elinen sportshylar kelgenin erekshe atap ótken jón. Búgin Qyrǵyzstan Táýelsizdik kúnin atap ótip jatyr. Baýyrymyz qyrǵyz halqyn merekemen quttyqtaǵym keledi, – dedi Qazaqstannyń kókpardan ulttyq quramasynyń kapıtany Qurmanbek Turǵanbek.
Onyń aıtýynsha, Qazaqstan quramasy 150-den astam sportshydan jasaqtalǵan.
Qazaqstandyq sportshylar Oıyndar aıasynda sporttyń 20 túrinen jarysqa qatysady.
Buǵan deıin Qyrǵyzstan astanasyndaǵy jańa «Bishkek Arena» stadıonynda VI Dúnıejúzilik kóshpendiler oıyndarynyń saltanatty ashylý rásimi bastalǵany habarlanǵan bolatyn.
Oǵan Qazaqstan Prezıdenti Qasym-Jomart Toqaev bastaǵan memleket basshylary jáne Shanhaı yntymaqtastyq uıymynyń sammıtine qatysý úshin kelgen birqatar halyqaralyq uıymdardyń jetekshileri qatysyp jatyr.
