Qazaqstanmen shekarada esirtkimen ustalǵan sheteldik ómir boıyna sottalýy múmkin
SQO Polıtsııa departamenti baspasóz qyzmetiniń málimetinshe, M.Jumabaev aýdandyq polıtsııa bóliminiń qyzmetkerleri QR Ulttyq qaýipsizdik komıteti Shekara qyzmetiniń áskerı qyzmetshilerimen birge esirtki tasymaldaýshyny ustady.
M.Jumabaev aýdanyndaǵy «Qaraqoǵa» keden beketinde «Toyota Landcruiser» avtokóligin tekserý kezinde mashınadan 397,35 gramm gashısh tabylǵan. Rýlde 53 jastaǵy Reseı azamaty bolǵan. Atalmysh fakti «Kontrabanda» babymen Sotqa deıingi tergep-tekserýdiń biryńǵaı tizilimine engizildi. Bul bap boıynsha 15 jyldan 20 jylǵa deıin nemese ómir boıyna bas bostandyǵynan aıyrý jáne dúnıe-múlkin tárkileý jazasy qarastyrylǵan. Sondaı-aq kólik júrgizýshisi rýlge esirtkige elitken kúıi otyrǵandyqtan, 15 táýlikke ákimshilik qamaýǵa alyndy.
SQO-da «Dármek» respýblıkalyq jedel-aldyn alý is-sharasynyń ekinshi kezeńi ótti. Onyń maqsaty – esirtki jáne psıhotropty zattardyń zańdy aınalymyn baqylaý. Tártip saqshylary 5 kún boıy medıtsınalyq jáne farmatsevtıkalyq mekemelerde esirtki zattary bar preparattardy saqtaý, paıdalaný jáne joıý erejeleriniń qanshalyqty saqtalatynyn tekserdi.
«Operatsııa barysynda esirtki zattary bar preparattarǵa qatysty zańbuzýshylyqtardy anyqtamasaq ta, medıtsınalyq maskalardyń zańsyz satylyp jatqanynyń ústinen tústik. Medıtsınalyq ónim bolǵandyqtan ony tek dárihanalar ǵana sata alady. Medıtsınalyq maskany zańsyz satýdyń 12 deregin jáne dárihanalarda bul buıymnyń baǵasyn kóterip satýdyń 2 faktisin anyqtadyq», - deıdi SQO PD esirtki qylmysyna qarsy is-qımyl basqarmasy bastyǵynyń mindetin atqarýshy Ivan Terzıdı.
Jedel-aldyn alý is-sharasy barysynda 3 qylmystyq zańbuzýshylyq anyqtalyp, 538,76 g esirtki tárkilendi. Jalpy jyl basynan SQO polıtseıleri 226 kg túrli esirtkini aınalymnan aldy.
