Qazaqstanmen seriktes bolǵymyz keledi - Netanıahý

ASTANA. QazAqparat - Izraıl Premer-mınıstri Bınıamın Netanıahý barsha qazaqstandyqty el Táýelsizdiginiń 25 jyldyq mereıtoıymen quttyqtady, dep habarlaıdy QazAqparat.

«Qazaqstanǵa saparmen kelgen ızraıldik birinshi premer-mınıstr bolý múmkinshiligi men úshin zor basymdyq  dep bilemin. Bul saparym Qazaqstannyń 25 jyldyq mereıtoıymen tuspa-tus kelip otyr. sondyqtan óz quttyqtaýymdy jetkizsem», - dedi ol QR Prezıdenti Nursultan Nazarbaevpen keńeıtilgen quramdaǵy kelissózderden keıingi birlesken málimdeme barysynda.

Sonymen qatar ol Nursultan Nazarbaev saıasatynyń kóregendigin basa aıtyp ótti.

«Tóńiregińizge qarasańyz, jańa ulttyń órlegendigin kóresizder. Men muny joǵary baǵalaımyn jáne Sizdiń bolashaqqa degen kózqarasyńyzǵa tántimin. Siz shıkizatqa negizdelgen ekonomıkany jańa ekonomıkaǵa kóshirý jóninde óte durys aıttyńyz. Biz bul mindetti birlesip atqara alamyz dep esepteımiz», - dedi Netanıahý Qazaqstan Prezıdentine qarata.

Izraıl Úkimet basshysy gaz tabylǵanǵa deıin óz elinde tabıǵı resýrstardyń kóp bolmaǵandyǵyn aıtty.

«Sizder Izraıldi energetıka eksporttaýmen aınalysatyn el retinde oılaıtyn shyǵarsyzdar. Biraq, osy ýaqytqa deıin bizge kóptegen zattardy eksporttaýmen aınalysýǵa týra keldi. Qazirgi ýaqytta bizdiń jaǵdaıymyz jaqsy, tabıǵı resýrstarymyz da, tehnogendik reýstarymyz da bar. Menińshe, sizderdiń de, bizdiń de isteýge tyrysyp jatqanymyzdy úılestirý tamasha baılanys bola alar edi. Bul bizdiń EKSPO-ǵa qatysýǵa nıet tanytýymyzdan-aq baıqalady. Bul rette biz óte jedel sheshim qabyldadyq. Biz osy jerde bolǵymyz, seriktes bolǵymyz keledi», - dedi Izraıl Úkimet basshysy.