Qazaqstanmen qosh aıtysqan AQSh bas konsýly qurt pen etti saǵynatynyn aıtty

ALMATY. QazAqparat - Búgin AQSh-tyń Qazaqstandaǵy bas konsýly Mark Mýdı sońǵy jumys kúninde almatylyqtarmen qoshtasý rolıgin jarııalady, dep habarlaıdy QazAqparat tilshisi. 

AQSh konsýly beınekadrda qala turǵyndaryna alǵys aıtty. 

«Almatydaǵy dostarymmen, áriptesterimmen qoshtasatynymdy oılasam, muńǵa batamyn. Men osy keremet qalada jumys istegenim úshin, Ońtústik aımaqta Aral teńizinen bastap Jońǵar qaqpasyna deıin aralaǵanym úshin baqyttymyn», - dedi ol.

Konsýl Qazaqstannyń ulttyq taǵamdarynan neni saǵynatynyn aıtty. 

«Meniń esimnen Qyzylordada jegen et pen Qazyǵurtta dám tatqan qurt ketpeıdi. Barlyqtaryńyzǵa kórsetken qoldaýlaryńyz úshin kóp rahmet, jelidegi jazylýshylarymyzǵa da alǵys», - dedi konsýl.

Aıta ketý kerek, AQSh-tyń Almatydaǵy bas konsýldyǵy burynǵy qurammen jumysyn jalǵastyra beredi. 

Jańa bas konsýldyń kim bolatyny keıin jarııalanady. Mark Mýdı Amerıka Qurama Shtattarynyń Almatydaǵy bas konsýly qyzmetine 2015 jyldyń 24 tamyzynda taǵaıyndalǵan bolatyn. M.Mýdı dıplomatııa salasyna 1995 jyly kelgen. Rod-Aılend shtatyndaǵy Nıýport áskerı teńiz kolledjin támamdaǵan.