Qazaqstanmen qarym-qatynasty odan ári damytýǵa umtylamyz — Pýtın
MÁSKEÝ. KAZINFORM — Qazaqstan men Reseı prezıdentteri kelissóz júrgizdi. Kelissóz barysynda Reseı Federatsııasynyń prezıdenti Vladımır Pýtın Qazaqstan men Reseı — jaqyn seriktes, dostas ári odaqtas elder ekenin aıtty. Bul týraly Aqordanyń baspasóz qyzmeti málim etti.
Onyń sózinshe, bul naqty isterden baıqalady. Reseı — Qazaqstannyń jetekshi saýda-ekonomıkalyq seriktesteriniń biri jáne basty ınvestorlar qatarynda. Byltyr saýda aınalymy 27 mıllıard dollardan asty.
— Qurmetti Qasym-Jomart Kemeluly, Sizdi Máskeýde, Kreml saraıynda qarsy alǵanyma óte qýanyshtymyn. Búgin Máskeýge Úkimet múshelerinen jáne bıznes ókilderinen quralǵan úlken delegatsııa kelgenin kórip otyrmyz. Qazaqstanmen aradaǵy qarym-qatynasymyz qarqyndy damyp keledi. Negizgi qujattarda jazylǵan ýaǵdalastyqtardyń ózektiligin ómirdiń ózi kórsetýde. Qazaqstan men Reseı — jaqyn seriktes, dostas ári odaqtas elder. Bul naqty isterden baıqalady. Reseı — Qazaqstannyń jetekshi saýda-ekonomıkalyq seriktesteriniń biri jáne basty ınvestorlar qatarynda. Byltyr saýda aınalymy 27 mıllıard dollardan asty. Bıylǵy 9 aıda bul kórsetkish 20 mıllıard dollarǵa jetti. Kóptegen reseılik kompanııa Qazaqstanda tabysty jumys istep jatyr. Qazaqstannyń bıznes ókilderi de Reseıde óz kásipterin ashyp, belsendi júrgizýde. Biz halyqaralyq arenada tyǵyz baılanys ornattyq. Birqatar óńirlik uıymǵa múshemiz. Aldaǵy kúnderi Bishkekte ótetin UQShU forýmynda, odan keıin Sankt-Peterbýrgtegi TMD-ǵa jáne EAEO-ǵa múshe memleketter basshylarynyń dástúrli basqosýlarynda kezdesemiz. Baǵdarlamamyz óte mazmundy, onyń barlyǵy oryndalyp jatyr. Sizdiń búgingi saparyńyzdyń qorytyndysy boıynsha memorandýmdar ázirlendi. Bul baılanystarymyzdy joǵary memleketaralyq deńgeıge shyǵarýdy kózdeıdi. Árıne, bul bizdi qýantady. Qazaqstanmen qarym-qatynasty odan ári damytýǵa umtylamyz, — dedi Reseı kóshbasshysy.
Budan buryn habarlanǵandaı, Kremlde Qasym-Jomart Toqaevty resmı qarsy alý rásimi ótti.
Keıinnen Qasym-Jomart Toqaev pen Vladımır Pýtınniń kelissózi bastalǵany belgili boldy.
Aıta keteıik, keshe Memleket basshysy Qasym-Jomart Toqaev Reseı Prezıdenti Vladımır Pýtınniń shaqyrýymen Máskeýge memlekettik saparmen bardy.
Prezıdent Máskeýdegi halyqaralyq qatynastar ınstıtýtynyń stýdentterimen áńgimelesti.
Keıinnen Kremlde Qasym-Jomart Toqaev pen Vladımır Pýtınniń beıresmı kezdesýi ótti.