Qazaqstanmen dostyq qarym-qatynasty joǵary baǵalap otyrmyz – Tájikstan vıtse-premeri
«Qazaqstan Respýblıkasy Tájikstannyń mańyzdy strategııalyq seriktesi sanalady jáne biz tyǵyz ári dostyq qarym-qatynasty joǵary baǵalap otyrmyz. Qazirgi jahandyq syn-qaterler men táýekelderdiń jaǵdaıynda yntymaqtastyq salalaryn keńeıtý bárimiz úshin mańyzdy basymdyqqa aınalyp keledi. Saýda-ekonomıkalyq baılanystardyń jalpy sıpattamasynda ózara saýda kórsetkishteri mańyzdy. Qazirgi kezde Qazaqstan Tájikstannyń syrtqy saýda seriktesteri arasynda eksport-ımport operatsııalary boıynsha ekinshi orynda tur», - dedi S. Zıezoda Astanadaǵy Qazaqstan-Tájikstan bıznes-forýmynda.
Onyń aıtýynsha, byltyr ózara saýda 263 mln AQSh dollaryna nemese 20 paıyzdan astam deńgeıde artty.
«Sonymen qatar, tájik-qazaq qarym-qatynastarynda yntymaqtastyqtyń ekonomıkalyq bóligin keńeıtý turǵysynda zor múmkindikter bar ekenin atap ótkim keledi. Búginde Tájikstanda ekonomıkaǵa ınvestıtsııa tartý úshin barlyq jaǵdaı jasalǵan. Bank jáne ekonomıkanyń naqty sektorlaryn qoldaýǵa nazar aýdarylyp otyr. Kásipkerlik qyzmetpen baılanysty rásimderdi jeńildetýge baǵyttalǵan tıisti saıasatty reformalaý úderisi eskerilgen. Búginde bizde ashyq ekonomıka jáne qolaıly ınvestıtsııalyq ahýal qalyptasqan», - dedi ol.
S. Zıezodanyń sózine qaraǵanda, Tájikstanda Qazaqstan kapıtalynyń qatysýymen 100-den astam birlesken kásiporyn qurylyp, jumys istep jatyr. Ónerkásiptik kooperatsııa salalaryn keńeıtýge qoldaý jasalyp otyr. Aýyl sharýashylyǵy ónimderin qaıta óńdeý, resýrstardy ıgerý jáne óńdeýshi sektorǵa, kólikke, energetıkaǵa ınvestıtsııany ulǵaıtý, saýda-logıstıkalyq ortalyqtardy qurý, týrızmdi damytý jáne týrıstik hab qurý qamtylǵan.
«Tsıfrlyq ekonomıkany damytý jáne ınnovatsııalyq tehnologııalardy engizý salasyndaǵy yntymaqtastyqty jandandyrý elderimizdiń álemdik deńgeıde básekege qabilettiligin arttyrýǵa yqpal ete alady», - dedi ol.
Budan buryn habarlanǵandaı, 2023 jyldyń І toqsanynda Qazaqstannan Tájikstanǵa eksport kólemi 200 mln dollarǵa jýyqtady.
Osy aptada Tájikstan Prezıdenti Qazaqstanǵa memlekettik saparmen keledi.