Qazaqstan–Qyrǵyzstan shekarasynda 400-ge jýyq júk kóligi kezekte tur
ASTANA. KAZINFORM — Jambyl oblysyndaǵy «Qarasý» avtomobıl ótkizý beketinde Qyrǵyzstanǵa qaraı baǵyt alǵan 400-ge jýyq júk kóligi kezekte tur. Memlekettik kirister komıtetiniń málimetinshe, kólik aǵynynyń kóbeıýi ýaqytsha, al buǵan birneshe faktor sebep bolǵan.
Memlekettik kirister komıtetiniń málimetinshe, shekarada kólik kezeginiń paıda bolýyna halyqaralyq júk tasymaly kóleminiń maýsymdyq artýy, sondaı-aq Qyrǵyzstan aýmaǵynda júk kólikteriniń qozǵalysyna aýa raıyna baılanysty engizilgen shekteýler áser etken.
Qazir vedomstvo múddeli memlekettik organdarmen birlesip, jaǵdaıdy turaqtandyrý jáne ótkizý beketiniń ótkizý múmkindigin arttyrý úshin tıisti sharalar qabyldap jatyr.
— Ótkizý beketiniń jumysy kúsheıtildi. Іshki ister organdarymen birlesip kólik aǵynyn retteý jáne onyń bir bóligin jaqyn mańdaǵy ótkizý beketterine qaıta baǵyttaý uıymdastyryldy. Jaǵdaıdy jedel baǵalaý jáne qabyldanatyn sharalardy kelisý úshin Qyrǵyz Respýblıkasynyń quzyrly organdarymen turaqty baılanys ornatylǵan, — dep habarlady vedomstvo.
Tasymaldaýshylar men júrgizýshilerge ótkizý beketindegi jaǵdaı jáne balama baǵyttar týraly jedel aqparat berilip jatyr.
— Tasymaldaýshylar men júrgizýshilerge aqparat berý úshin messendjerlerde jumys isteıtin arna bar. Onda ótkizý beketterindegi jaǵdaı jáne yqtımal balama baǵyttar týraly ózekti aqparat jarııalanady. Sonymen qatar ótkizý beketine deıin júrgizýshilerge túsindirý jumystary júrgiziledi, — dep tolyqtyrdy Memlekettik kirister komıteti.
Budan bólek, Memlekettik kirister komıteti tasymaldaýshylardan marshrýttardy josparlaý kezinde qazirgi jaǵdaıdy eskerýdi surady.
Eske salaıyq, buǵan deıin qazaq-ózbek shekarasyndaǵy 40 shaqyrymdyq kezek paıda bolǵany týraly jazǵanbyz.
