Qazaqstan–Grýzııa: agroónerkásiptegi ózara saýda 116 mln dollarǵa jetti
ASTANA. KAZINFORM — Qazaqstan Grýzııaǵa aýyl sharýashylyǵy ónimderiniń eksportyn ulǵaıtýǵa daıyn. Bul týraly Aýyl sharýashylyǵy mınıstri Aıdarbek Saparov Grýzııanyń Qorshaǵan ortany qorǵaý jáne aýyl sharýashylyǵy mınıstri Davıd Songýlashvılımen kezdesýi barysynda málimdedi, dep vedomstvonyń baspasóz qyzmeti jazdy.
Kelissózder Parıjde ótken Dúnıejúzilik janýarlar densaýlyǵy uıymynyń (DJDU) 93-Bas sessııasy aıasynda ótti.
Ótken jyldyń qorytyndysy boıynsha eki el arasyndaǵy agroónerkásiptik ónimder saýdasy 77%-ǵa artyp, 116 mln AQSh dollarynan asty. Grýzııaǵa negizinen bıdaı men bıdaı-qara bıdaı, sút ónimderi, pııaz jáne et ónimderi eksporttaldy.
— Eki el arasyndaǵy aýyl sharýashylyǵy ónimderiniń saýda qarqyny turaqty ósip keledi, bul ózara yntymaqtastyq áleýetiniń joǵary ekenin kórsetedi. Biz astyq, un, ósimdik maılary, et jáne sút ónimderi, makaron jáne kondıterlik ónimderdi jetkizýge daıynbyz, — dedi Aıdarbek Saparov.
Kezdesý barysynda eki jaq Grýzııa naryǵyna shoshqa eti men tiri shoshqa eksportyn keńeıtý máselelerin ortaǵa saldy.
— Veterınarııa salasyndaǵy ózara is-qımyl da ózekti baǵyttardyń biri. Byltyr qańtar aıynda eki eldiń veterınarııalyq qyzmetteri Qazaqstannan Grýzııaǵa asyl tuqymdy jáne taýarlyq iri jáne usaq múıizdi maldy, sondaı-aq soıýǵa arnalǵan iri qara jáne usaq maldy eksporttaýǵa arnalǵan veterınarııalyq sertıfıkattar boıynsha kelisken bolatyn. Jumys jalǵasady, — delingen habarlamada.
Taraptar sondaı-aq kadr daıarlaý, agrarlyq sektordy ǵylymı súıemeldeý, birlesken ınvestıtsııalyq jáne ǵylymı jobalardy iske asyrý múmkindikterin de nazardyn tys qaldyrmady.
Óz kezeginde Davıd Songýlashvılı grýzın tarapynyń Qazaqstanmen áriptestikti odan ári nyǵaıtýǵa jáne agrarlyq saladaǵy ózara tıimdi yntymaqtastyqty damytýǵa múddeli ekenin rastady.
Sonymen qatar, qazaqstandyq delegatsııa músheleri frantsýz bıznes ókilderimen birqatar kezdesýler ótkizdi.
Atap aıtqanda, agroónerkásiptik keshendegi ınvestıtsııalyq yntymaqtastyqty damytý máseleleri boıynsha Harvest Group SA kompanııasymen kelissózder júrgizildi. Boehringer Ingelheim basshylyǵymen aýsylǵa qarsy vaktsınalar óndirý jáne bıologııalyq qaýipsizdikti nyǵaıtý baǵytyndaǵy áriptestik perspektıvalary talqylandy.
Sondaı-aq sýarý jáne ırrıgatsııalyq júıeler óndirýde Eýropanyń jetekshi kompanııalarynyń biri — IrriFrance ókilderi sý únemdeý tehnologııalary men sýarmaly eginshilikke arnalǵan zamanaýı sheshimderdi tanystyrdy.
Eske sala keteıik, buǵan deıin Qazaqstan mal sharýashylyǵy ónimderin Grýzııa arqyly álemdik naryqqa shyǵarýǵa nıetti ekenin jazdyq.
