Qazaqstanǵa jyl saıyn sý tasqynynan 419 mln dollar shyǵyn keledi

NUR-SULTAN. QazAqparat – Jyl saıyn bolatyn tótenshe jaǵdaılardan Qazaqstan ekonomıkasyna shamamen 477 mln dollar shyǵyn keledi. Onyń 419 mln dollary sý tasqyny saldarynan, dep habarlaıdy QazAqparat tilshisi energyprom.kz-ke silteme jasap.

Ortalyq Azııa óńirlik ekologııalyq ortalyǵynyń bıylǵy esebine sáıkes, sý tasqynynan bolatyn ortasha jyldyq shyǵyn – 419 mln dollar. Bul jer silkinisinen bolatyn zardaptan 7 ese artyq.

Qazaqstannyń barlyq aımaqtarynda sý tasqyny qaýpi bar. Olardyń orta eseppen alǵandaǵy shyǵyny 30 mln dollardan asady. Al, tasqynnan eń kóp kólemde zardap shegetin óńir – Qyzylorda oblysy. Aımaqtyń jyldyq shyǵyny – 60,7 mln dollar. Odan keıin Batys Qazaqstan, Aqmola jáne Túrkistan oblystary tur. Olarǵa jyl saıyn keletin zardap 40 mln dollardan asady.

Qazaqstandaǵy sý tasqynynan zardap shekken adamdardyń ortasha jyldyq sany – shamamen 156 myń adam. Qurbandar eń kóp Aqmola (22 myń adam) jáne Qyzylorda oblystarynda (19,4 myń adam) tirkeledi.

Sonymen qatar, jer silkinisinen bolatyn shyǵyndar da az emes. Keletin jyldyq zardap – 57,6 mln dollar. Onyń 46,8 mln-y Almaty oblysyna, 8,9 mln-y Túrkistan jáne 1,6 mln dollary Jambyl oblysyna tıesili.

Ortalyq Azııa óńirlik ekologııalyq ortalyǵynyń dereginshe, jyl saıyn jer silkinisinen 44 myńǵa jýyq qazaqstandyq zardap shegedi.