Qazaqstanǵa jyl basynan beri 3 myńnan astam oralman keldi
QR Densaýlyq saqtaý jáne áleýmettik damý mınıstrliginiń baspasóz qyzmetinen habarlaǵandaı, oralmandardyń basym kópshiligi Jambyl oblysynda - 213 otbasy (529 adam), Ońtústik Qazaqstan oblysy - 208 otbasy (527 adam), Qostanaı oblysy - 189 otbasy (452 adam), Mańǵystaý oblysy - 108 otbasy (487 adam), sondaı-aq ózge de aımaqtarǵa qonystanǵan. Olardyń kópshiligi 78,6% - Ózbekstannan, 6,7% - Túrikmenstannan, 6% - Qytaıdan, 3,1% - Mońǵolııadan, al 5,6 % basqa aımaqtardan kelgen.
Eńbekke jaramdy jastaǵy tulǵalardyń kórsetkishi - 61,1%, 18 jasqa deıingi balalar - 32,5%, zeınetkerler - 6,3%-dy qurap otyr. Eńbekke jaramdy jastaǵy oralmandardyń 49,6%-y jalpy orta bilimdi, 32,8%-orta arnaýly, 15,4% - joǵarǵy bilimdi, 2,1%-nyń bilimi joq.
Esterińizge sala keteıik, 1991 men 2014 jyldar aralyǵynda Qazaqstanǵa 259 myń 159 otbasy, ıaǵnı 952 myń 882 etnıkalyq qazaqtar qaıta kelip, oralman mártebesin alǵan bolatyn. Bul jalpy halyq sanynyń 5,5%-yn qurady.
Qazirgi tańda QR Parlamenti Elbasynyń 2014 jylǵy 4 mamyrdaǵy tapsyrmasyn júzege asyrý maqsatynda ázirlengen «Keıbir zańnamalyq aktilerge halyqtyń kóshi-qony jáne jumyspen qamtylýy máseleleri boıynsha ózgerister men tolyqtyrýlar engizý týraly» QR Zańynyń jobasyn qarastyrýda.
Etnıkalyq qazaqtardy óz tarıhı otanyna oralýǵa yntalandyrý maqsatynda Zań jobasy: etnıkalyq qazaqtarǵa qonystaný óńirine qaramastan oralman mártebesin berý máselelerin qarastyrady. Olarǵa sheteldik azamattarǵa qaraǵanda kóshi-qon polıtsııasyna habarlasý arqyly tólem qabiletin rastaýsyz ýaqytsha turý yqtııarhatyn alý múmkindigi beriledi; etnıkalyq qazaqtarǵa Úkimet belgilegen óńirlerge qonystanǵan jaǵdaıda áleýmettik paket beriledi. Sondaı-aq elimizdiń kez kelgen óńirinen Úkimet aıqyndaǵan ekinshi óńirge qonystanǵan oralmannyń áleýmettik qoldaýdy alýǵa múmkindigi bolady. Eger olar qonystanǵan óńirden 5 jyl merzimnen buryn qonys aýdaryp ketetin bolsa, alǵan kómekterin Úkimetke qaıtarý mindetteri qarastyrylǵan. Oralmandarǵa Qazaqstan Respýblıkasynyń azamattyǵyn berý merzimin ýaqytsha turý yqtııarhatyn alǵannan keıin 1 jylǵa deıin qysqartý kózdeledi.
