Qazaqstanǵa jyl basynan beri 24,6 mln dana gúl ákelindi

ASTANA. QazAqparat – Qazaqstanǵa jyl basynan beri 24,6 mln dana gúl ákelindi, dep habarlaıdy QazAqparat Memlekettik kirister komıtetiniń baspasóz qyzmetine silteme jasap.

2023 jyldyń qańtar-aqpan aılarynda Qazaqstanǵa salmaǵy 1 341 tonna gúl nemese 24,6 mln dana gúl taly ákelingen. Aqpan aıynyń jedel aqparatyna sáıkes, onyń quny 9,5 mln AQSh dollaryna teń.

Suranysy eń joǵary – raýshan gúlderi: salmaǵy 799 tonna nemese 18 mln dana gúl taly ákelingen, quny – 5,8 mln AQSh dollaryna jýyq. Ekinshi orynda – hrızantemalar (salmaǵy – 134 tonna nemese 2,4 mln dana gúl taly, quny – 1,3 mln AQSh dollary), úshinshi orynda – qalampyr (salmaǵy – 31 tonna nemese 922,7 myń dana gúl taly, quny – 161 myń AQSh dollary).

Sonymen qatar, lalagúl de joǵary suranysqa ıe, onyń 35 tonnasy 192 myń AQSh dollaryna ákelingen. Basqa da jańa kesilgen 376,8 tonna gúl (qyzǵaldaq, hydrangeas, lınolıým, gıpsofıla, fınıks, ırıs, gortenzııa jáne t.b. ekzotıkalyq gúlder) 2,2 mln AQSh dollaryna ákelingen.

Bıyl gúlder negizinen Ekvador (769 tonna), Nıderlandy (268 tonna), Kolýmbııa (137 tonna), Kenııa (108 tonna), Izraıl (16 tonna), Ózbekstan (14 tonna), Qytaı (13 tonna) jáne Túrkııa (6 tonna) elderinen ákelingen.

Ótken jyly da raýshan gúlderi joǵary suranysta bolǵan. Jalpy, 2022 jyly Qazaqstanǵa 46,7 mln AQSh dollaryna 6 690 tonna gúl ákelingen.

Sondaı-aq, ótken jyly qazaqstandyq raýshan Ózbekstanda suranysqa ıe bolyp, 94 myń AQSh dollaryna 25 tonna gúl eksporttalǵan.