Qazaqstanǵa joǵary bilimi bar adamdardyń kóship kelý kórsetkishi ósti

ASTANA. KAZINFORM – 2024 jylǵy qańtar-maýsym aılarynda ishki kóshi-qonda 688 myń adam tirkeldi. Bul týraly QR Eńbek jáne halyqty áleýmettik qorǵaý vıtse-mınıstri Asqarbek Ertaev málim etti.

«2024 jyly syrtqy kóshi-qonda oń dınamıka baıqalady. Kóshi-qonnyń oń saldosy 2 jyl boıy saqtalyp keledi. 2024 jyldyń birinshi jartyjyldyǵynyń qorytyndysy boıynsha kóshi-qon saldosy +7,3 myń adamdy qurady. Elge 14 myń adam kelip, 7 myń adam kóship ketti. Elderdiń bólinisi boıynsha kóshi-qon ósimi negizinen Táýelsiz memleketter dostastyǵy elderi men Qytaı Halyq Respýblıkasyna tıesili», - dedi A.Ertaev Ortalyq kommýnıkatsııalar qyzmetindegi baspasóz máslıhatynda

Sonymen qatar ol bilim deńgeıi boıynsha da oń saldo qalyptasqanyn, ıaǵnı elimizge bilimdi adamdar kóbirek kelgeni baıqaldy. Budan basqa, tehnıkalyq mamandyqtar boıynsha +686 adam, pedagogıkalyq mamandyqtar boıynsha +215 adam, ekonomıkalyq mamandyqtar boıynsha +203 adamdy quraıtyn oń saldo qalyptasty.

«Іshki kóshi-qonǵa toqtalsaq, el aýmaǵynda qonys aýdarýshylar sany byltyrǵy sáıkes kezeńimen salystyrǵanda 1,7 ese ósti (01.07.2023 j. - 397 myń adam, 01.07.2024 j. - 688 myń adam). 2024 jylǵy qańtar-maýsym aılarynda ishki kóshi-qonǵa 688 myń adam qatysty. Onyń ishinde oblysaralyq qonys aýdarýda 307 myń adam tirkeldi. Megapolıster ishki mıgranttardy tartý ortalyqtary bolyp qalyp otyr (50%). Máselen, osy kezeńde Astana qalasyna turaqty turý úshin 64 myńnan astam adam, Almaty qalasyna 60 myń adam, Shymkent qalasyna 31 myń adam kóship keldi», - dedi vıtse-mınıstr.