Qazaqstanǵa jetkizilgen kerqulandar sany 17-ge jetti

ASTANA. KAZINFORM – Torǵaı dalasyn kerqulandar qaıta mekendeı bastady. Jylqylar Praga haıýanattar baǵy men majar ulttyq parkinen jetkizilgen. Bul – «Jabaıy jylqylardyń oralýy» jobasy aıasyndaǵy ekinshi halyqaralyq tasymal. Janýarlar «Altyn Dala» memlekettik tabıǵı rezervatynyń aýmaǵynda, arnaıy beıimdeý ortalyǵynda bir jyl ustalady da, keıin tabıǵatqa jiberiledi.

Qazaqstan – kerqulandardyń tarıhı mekeni. Demek, tuıaqtylardyń Turannyń tósinde tarpýy zańdylyq. Buǵan tańǵalýǵa bolmaıdy. Chehııa men Majarstannan kelgen jabaıy jylqylar «Altyn Dala» memlekettik tabıǵı rezervatyndaǵy beıimdeý ortalyǵyna ornalastyryldy. Qazir Orman sharýashylyǵy jáne janýarlar dúnıesi komıtetiniń mamandary olardy zerttep, baqylaýda ustap otyr.

– Negizi, jastary 3-4-te. Jaǵdaıy jaqsy. Arnaıy tekserýden ótip, ushaqpen ushýdy kótere alatyn jylqylardy tańdap, Qazaqstanǵa jiberdi. Endi biz olardy bir jyl kóleminde beıimdeý ortalyǵynda baqylaımyz, - deıdi Qazaqstannyń bıoártúrlilikti saqtaý qaýymdastyǵynyń mamany Qanat Batyrhanuly.

Kerqulandar – kez kelgen klımattyq jaǵdaıǵa beıim. Aıtpaqshy, byltyr ákelingen 7 jylqynyń birden jersinýi osyǵan dálel. Olar Qostanaıdyń qary men Torǵaıdyń tońazyǵan aıazyna esh shimirikpepti. Tabıǵatta janýarlardyń qozǵalysyn baqylap otyrý úshin arnaıy GPS-qarǵybaý taǵylady. Bul – tuıaqtylarǵa monıtorıng jasaý úshin de septigin tıgizedi. Mamandardyń sózinshe, elge kelgen kerqulandar áli tóldemegen. Buǵan klımattyń ózgerýi sebep bolýy múmkin eken.

– Ol jaqta olar tóldegen. Biraq bizge ákelingen jylqylar áli tóldemeı jatyr. Osy mamandardyń aıtýy boıynsha olar joldan soń, bir jyldan keıin úzilis alyp, sodan keıin tól ákelýge daıyndalady dep. Ózderiniń sondaı erekshelikteri bar eken. Bizde áli ortalyqta tóldegen joq. Biraq tóldeıdi dep úmittenemiz, - deıdi mamandar.

Aıta keteıik, kerqulandar Qazaqstanǵa «Jabaıy jylqylardyń oralýy» jobasy aıasynda jetkizildi.

Negizinde Qazaq jerinde buryn bul jylqylar bolǵan. Sondyqtan ońaı jersinedi. «Jabaıy jylqylardyń oralýy» jobasy aıasynda osymen ekinshi ret Qazaqstanǵa kerqulan jiberip otyrmyz. Sondaı-aq, byltyr Mońǵolııaǵa jiberdik. Aldaǵy ýaqytta bul jumystar jalǵasady, - dep pikir bildirdi Býdapesht zoobaǵynyń dırektory Shosh Endre.

Mamandar 2029 jylǵa deıin Torǵaı dalasynda janýarlardyń odan ári kóbeıip, turaqty popýlıatsııa túzýine jaǵdaı jasap jatyr. Al jabaıy jylqylardyń sanyn 40–45 basqa jetkizý josparda bar.

Torǵaı dalasynda kerqulandar qaıta mekendeı bastaǵanyn jazǵan edik.