Qazaqstanǵa jetkiziletin sheteldik dári-dármekterdiń sapasy qalaı qadaǵalanyp jatyr
«Bizdiń ortalyq dárilik zattar men medıtsınalyq buıymdar salasyndaǵy memlekettik saraptaý uıymy bolyp tabylady. ıAǵnı, Qazaqstan Respýblıkasynyń aýmaǵynda ótkiziletin dáriler men medıtsınalyq buıymdardyń sapasy men qaýipsizdigin qamtamasyz etemiz. Basqa sózben aıtqanda, dárilik preparattar men dárilik buıymdardyń qazaqstandyq dárihanalardyń sórelerine túsýine deıin biz olardy keshendi saraptamadan ótkize otyryp, qaýipsizdigin, tıimdiligin jáne sapasyn, sondaı-aq belgilengen talaptarǵa sáıkestigin baǵalaımyz», - dedi Qanat Erjanov.
Onyń aıtýynsha, ulttyq ortalyq dári-dármekti úsh satydan turtyn tekseristen ótkizedi. Olardyń birinshisi - bastapqy saraptama, ekinshisi - mamandandyrylǵan saraptama, al úshinshisi - zerthanalyq synaq. Ulttyq ortalyqtyń oblystarda zerthanalary bar.
Qanat Erjanov óz sózinde atap ótkendeı, ulttyq ortalyq byltyr Eýrazııalyq ekonomıkalyq odaqtyń farmatsevtıkalyq naryǵyna shyǵý maqsatynda aýqymdy jumys júrgizgen. Osynyń nátıjesinde Qazaqstan EAEO elderiniń aýmaǵynda medıtsınalyq baǵytta qoldanýǵa arnalǵan dárilik preparatqa birinshi tirkeý kýáligin bergen. Sonymen qatar, EAEO sheńberinde Qazaqstan 2018 jyly referentti memleket retinde dárilik zattar saraptamasyn júrgizýge sheteldik jáne otandyq farmakologııalyq óndirýshilerden 23 ótinim qabyldaǵan.
«2018 jyly bizdiń ortalyq barlyǵy 6,5 myńnan astam dárilik zattar men medıtsınalyq buıymdarǵa saraptama jasady. Bul 2017 jylmen salystyrǵanda 18 paıyzǵa kóbirek. Sonymen birge, ortalyq qyzmetkerleri 63 myńǵa jýyq medıtsınalyq ónimniń qaýipsizdigi men sapasy týraly qorytyndy berdi», - deıdi Qanat Erjanov.