Qazaqstanǵa jetkiziletin ımporttyq qus etteriniń basym bóliginiń sapasy syn kótermeıdi - G. Isaeva

ALMATY. QazAqparat - Qazaqstanǵa shet elderden jetkiziletin ımporttyq qus etteriniń basym bóliginiń sapasy syn kótermeıdi, ıaǵnı Eýrazııalyq ekonomıkalyq odaqtyń tehnıkalyq reglamentteriniń talaptaryna jaýap bere almaıdy. Bul týraly búgin Almatyda Qus ósirýshilerdiń tórtinshi Qazaqstandyq halyqaralyq forýmy barysynda QR Aýyl sharýashylyǵy vıtse-mınıstri Gúlmıra Isaeva málim etti.

«Taıaýda biz ár óńirde sýpermarketter men bazarlarda arnaıy reıd júrgizdik. Sonda shet elderden jetkizilgen qus etteriniń sapasy talaptarǵa saı emestigine kóz jetkizdik. Nege deısiz ǵoı? Olar «ınjektirlengen», ıaǵnı sýmen, fosfattarmen tolyqtyrylǵan ónimder. Bul qospalar, árıne, qus etin syrttaı jyltyratyp, kózge tartymdy etip kórsetedi. Al shyn mánisinde bul tutynýshylardy kórer kózge aldap soǵý. Óıtkeni, tutynýshy qur bosqa qus eti baǵasynyń 25-30 paıyzyn ondaǵy muzdatylǵan sý men fosfattar úshin tólep otyr», - dedi G. Isaeva.

Ol sonymen qatar, qazirgi tańda tutynýshylardyń quqyǵy men qaýipsizdigin saqtaý maqsatynda Eýrazııalyq ekonomıkalyq odaq aýmaǵynda qýatty synaq zerthanalary salynyp jatqandyǵyn aıtty.

«Qazir tehnıkalyq reglamenttiń talaptary qataıtyldy. Eýrazııalyq ekonomıkalyq odaq aýmaǵynda qýatty synaq zerthanalary salynyp jatyr. Bul barlyq mal sharýashylyǵy ónimderin, solardyń ishinde, ásirese, qus eti ónimderiniń qaýipsizdik kórsetkishterin baqylaýǵa múmkindik beredi. Onda qus etiniń ylǵaldylyǵy qandaı bolý kerektigi naqty kórsetilgen. Osylaısha sapasyz shet eldik taýarlardyń Qazaqstanǵa jetkizilýine tosqaýyl qoıylady, sáıkesinshe ádil básekelestikke negiz jasalady», - dedi G. Isaeva.

QR Aýyl sharýashylyǵy vıtse-mınıstri osy turǵyda Qazaqstandaǵy qus fabrıkalary ónimderiniń sapasy shet eldik ónimderge qaraǵanda óte joǵary ekendigin aıtty.

«Otandyq óndirýshiler tutynýshylardy aldamaıdy. Óıtkeni, qus fabrıkalaryn nesıemen qamtamasyz eter aldynda biz olarǵa shart qoıamyz. ıAǵnı, qus fabrıkalary óz ónimderiniń basym bóligin muzdatylǵan emes, salqyndatylǵan kúıde shyǵarýǵa mindetti. Óıtkeni qus etin salqyndatylǵan, balbyraǵan kúıinde tutyný qajet. Al muzdatylǵan ettegi beloktar buzylyp ketedi. Sondyqtan bizdiń basty maqsatymyz - otandyq tutynýshylardyń sapaly ónimderge qol jetkizýlerine múmkindik jasaý», - dedi G. Isaeva.

Aıta keteıik, Almatyda ótip jatqan Qus ósirýshilerdiń tórtinshi Qazaqstandyq halyqaralyq forýmy óz jumysyn aıaqtady.